खोज

रूपन्देही, १४ कात्तिक ।

रुपन्देहीको निर्वाचन क्षेत्र न. ५ मा गठबन्धनका उम्मेद्वारलाई विजयी बनाउन दलित मुक्ति मोर्चाले बिशेष अभियान थाल्ने भएको छ ।

नेकपा माओवादी केन्द्र निकट नेपाल दलित मुक्ति मोर्चा सैनामैना नगर कमिटीको बैठकले गठबन्धनका उम्मेद्वारलाई विजयी गराउन निर्वाचन केन्द्रित अभियान सञ्चालन गर्ने भएको हो । संविधानको रक्षा, गणतन्त्र, धर्मनिरपेक्षता र समावेशिताको पक्षमा मतदान गर्न गठबन्धनको पक्षमा उभिन समेत मोर्चाले आह्वान गरेको हो । मुक्ति मोर्चाले गठबन्धनमा आबद्ध दल निकटका दलित भातृ संगठनहरुको संयुक्त कार्यक्रम गर्ने समेत निर्णय गरेको छ ।

राजनीतिक दलहरुले चुनावका बेलामा दलित, महिला, मधेशी सिमान्तकृत तथा लक्षित वर्ग समुदायलाई चुनाव जित्ने भोटरका रुपमा मात्र प्रयोग गर्ने गरेकाले त्यसको अन्त्य हुनका लागि पनि दलित तथा सिमान्तकृत समुदायका व्यक्तिहरुले विकास, सुशासन र पछाडि परेको वर्गको उत्थानका लागि काम गर्ने पार्टी र व्यक्तिलाई भोट हाली निर्वाचित गराउनका लागि टोल टोलमा पुगी सचेतनामुलक चुनावी प्रचारप्रसार गर्ने भएको हो ।

कार्यक्रममा रुपन्देही क्षेत्र न ५ (१) का प्रदेश सभा सदस्य पदका उम्मेद्वार विनोद पहाडीले रुपन्देहीको क्षेत्र नं. ५ को विकास र समन्यायिक विकासका लागि गठबन्धनका उम्मेद्वारलाई जिताउन अपिल गरे । उनले जनताको दैनिक जीवनस्तर सुधारका लागि सञ्चार र मानव अधिकारको क्षेत्रबाट सदैव पहल गरेको बताए । उनले आफु तल्लो तहबाटै संघर्ष गरेर अहिले प्रदेशसभा सदस्य पदको उम्मेद्वारको रुपमा उम्मेद्वारी दिएको बताउँदै जनताको प्रत्यक्ष सरोकारका बिषयमा निरन्तर आवाज विहीनहरुको आवाज बन्ने प्रतिबद्धता जनाए । उनले गठबन्धनबाट प्रतिनिधिसभा तर्फ नेपाली काँग्रेसका उम्मेद्वार भरत शाह र प्रदेशमा आफू उम्मेद्वार रहेको बताए ।

बैठकमा नेकपा माओवादी केन्द्र लुम्बिनी प्रदेशका सदस्य दीपिका शर्मा, प्रदेश सदस्य अमर क्षेत्री लगायतले बोलेका थिए ।