खोज

नवलपुर, १३ वैशाख ।

पुर्वी नवलपरासीमा सोमबारदेखि फैलिएको आगो अहिले जिल्लाका एक सय ५० बढी स्थानका जँगलमा लागेको छ । सोमबार दिउँसोदेखि फैलिएको आगलागी जिल्लाका आठै पालिकामा रहेको वन जंगलमा डढेलोका रुपमा फैलिएको छ ।

पुर्व–पश्चिम राजमार्गको दायाँबायाँ रहेको जँगलमा र कालीगण्डकी करिडोरको आसपास बुलिङटार, बौदीकाली गाउँपालिकाको ८० बढी जँगलमा सोमबार साँझदेखि फैलिएको आगो अहिले सम्म पनि दन्किरहेको बुलिङटार गाउँपालिकाका वडा नं. ३ का पुर्व वडाध्यक्ष यमबहादुर झेँडी मगरले बताए ।

कालीगण्डकी करिडोरको ढोंडनी, भोक्रोफाँट, गडम्दी, कोटथर, डाँडाझेरी बुलिङटार हुँदै बौँदीकालीका सबै जंगलमा आगो फैलिएको जिल्ला वन डिभिजनल कार्यालयका सूचना अधिकृत समिर लम्सालले बताए ।

पहाडी क्षेत्रमा फैलिएको आगलागीबाट कुुनै मानवीय क्षति भने नभएको र अहिले त्यस क्षेत्रमा प्रहरी समेत परिचालन गरी सम्भाबित घटनाबाट बचाउन आवश्यक कार्यहरु गरिएको जिल्ला प्रहरी कार्यालयका प्रहरी निरीक्षक साजनकुमार शर्माले बताए ।

पहाडी क्षेत्रमा स्थानीयले समेत गस्ती गरी डढेलो गाउँबस्तीमा नपसोस् भन्ने उद्देश्यले काम गरिरहेका बुलिङटार गाउँपालिकाका अध्यक्ष दिपेन्द्र सुनारी मगरले बताए । गैंडाकोट नगरपालिकाको ५५ भन्दा बढी ठाउँका जँगलमा डढेलो लागेको छ ।

उता मध्यविन्दु नगरपालिका १४ चनौटे र सुर्खा गाउँमा भिषण आगलागी भएको छ । मध्यविन्दु १४ को सुर्खा जंगलमा सोमबारदेखि भएकोे आगलागीले १२ घर गोठ जलेर नष्ट भएको प्रहरी निरीक्षक साजन कुमार शर्माले बताए । शर्माका अनुसार आगलागीबाट चनौटेका सात र सुर्खाका पाँच घरगोठ जलेर नष्ट भएको छ ।

आगो निभाउने क्रममा मध्यविन्दु १४ चनौटेमा रहेको जनज्योति प्राविका शिक्षक देवचुली १३ प्रगतिनगर निवासी ५९ वर्षीय गंगाप्रसाद घिमिरे घाइते भएको शर्माले बताए । आगलागीमा परी मध्यविन्दु १४ का नवलसिंह ढेंगाको घरगोठ, लत्ताकपडा, भाडावर्तन र नगद एक लाख ६० हजार, भोगीराम ढेंगाको घरगोठ, लत्ताकपडा, भाडावर्तन, चारवटा कुखुरा, टेकबहादुर क्षेत्रीको घरगोठ, लत्ताकपडा भाडा वर्तन, तीनवटा बाख्रा, कर्मसिंह सोमैको घरगोठ, लत्ताकपडा, भाँडावर्तन पूर्ण रुपमा जलेर नष्ट भएको छ ।

त्यसैगरी खमबहादुर बारघरेको बाख्राको गोठ, लत्ताकपडा अन्नपात, हस्तबहादुर ढेंगाको बाख्रा गोठ, लत्ताकपडा अन्नपात र श्रीलाल सोमैको बाख्रागोठ लत्ताकपडा अन्नपात पूर्णरुपमा जलेर नष्ट भएको प्रहरी निरीक्षक शर्माले बताए ।

त्यसैगरी मध्यविन्दु १४ सुर्खामा टेकबहादुर सोमै मगरको गोठ, लत्ताकपडा, कमानसिंह सोमै मगरको गाइगोरुको गोठ, लत्ताकपडाअन्नपात, थेबेल सिसंह लम्कामगरको गाईबाख्राको गोठ, गोरु एउटा, बाख्रा तीन वटा, भैसी एक, रणबहादुर सोतीको गोठ र आइतसिंह सोमैको गोठ जलेर नष्ट भएको छ ।

अहिले पनि जिल्लाका सामुुदायिक वन र सरकारी वन क्षेत्रमा व्यापक रुपमा डढेलो लागिरहेको छ । स्थानीय प्रशासनले प्रहरी, नेपाली सेना, सशस्त्रलाई ‘अलर्ट’ मा राखेको जनाएको छ । जिल्लाका दुई सय बढी जंगल क्षेत्रमा लागेको आगो नियन्त्रणमा आउन समय लाग्ने जिल्ला वन डिभिजनल कार्यालयका सूचना अधिकृत लम्सालले बताए ।