खोज

कपिलवस्तु ।

नेपाल पुलिस क्लब तिलौराकोट गोल्ड कपको फाइनलमा प्रवेश गरेको छ । बुधवार सम्पन्न खेलमा थ्री स्टार क्लबलाई हराउँदै विभागीय पुलिस फाइनलमा पुगेको हो ।

सिनियर खेलाडी सहितको थ्री स्टार १–० गोल अन्तरले पराजित भएको छ । खेलको ५१ औँ मिनेटमा पुलिसको लागि जर्सी नम्बर १८ का विवेक पाण्डेले गोल गर्नु भयो । उहाँ म्यान अफ द म्याच चुनिनु भएको थियो । पाण्डे तिलोत्तमा नगरपालिका चार नम्बर ज्योती नगरका स्थायी बासिन्दा हुन् ।

खेलको अन्तिम समयमा थ्री स्टारले डी एरिया नजिकै फ्रिकिक हान्ने अवसर पाए पनि गोल हुन सकेन । पुलिसका किपर सन्जित श्रेष्ठले डाइभ हान्दै प्रहार विफल पारेका थिए । थ्री स्टारबाट पूर्व राष्ट्रिय टिमका कप्तान बिराज महर्जन, राष्ट्रिय टोलीका डिफेन्डर अनन्त तामाङ, अफ्रिकन खेलाडी अफेज उवालुक पहिलो रोजाइमा परेका थिए । गोल खाए पछि थ्री स्टारले पुलिसलाई दबाबमा राखे पनि गोल हान्न भने सकेन । दोस्रो सेमिफाइनल अन्तर्गत बिहीबार सुदूर पश्चिम ११ र हनामी विएफसी चितवन खेल्ने छ ।