खोज

बुटवल ।

गुल्मीको सत्यवती गाउँपालिका वडा नं.७ जुनियामा निःशुल्क १ दिने स्वास्थ्य शिविर सम्पन्न भएको छ । गुल्मी जुनिया चिदिपानी–तराइ सम्पर्क समाज रुपन्देहीको आयोजना तथा खत्री नर्सिङ होम बुटवल र क्रिमसन अस्पतालको प्राविधिक सहयोगमा भएको शिबिरमा ५ सय बढीले स्वास्थ्य सेवा लिएको समाजका अध्यक्ष कृष्ण बहादुर थापाले जानकारी दिए ।

शिविरमा भिडियो एक्सरे, इसिजी सेवा, नशा तथा मनोरोग, हाडजोर्नी, जनरल, रगत जाँच, सामान्य चेकजाँच र औंषधी वितरणको सेवा प्रदान गरिएको थियो । फेमली फिजिसियन डा. ढकबहादुर खत्री, नशा तथा मनोरोग विशेषज्ञ डा.सन्दिप शर्मा, हाडजोर्नी तथा नशा रोग विशेषज्ञ डा. शेखर प्रसाद पोख्रेल, जनरल फिजिसियन डा. कृष्ण चन्द गोदार, मेडिकल अधिकृत डा. यादव अर्याल र मेडिकल अधिकृत डाक्टर विपिन ढकालले स्वास्थ्य सेवा दिएका थिए ।

शिविरको शुभारम्भ गर्दै सत्यवती गाउँपालिका अध्यक्ष टिकाराम पाण्डेले ग्रामीण भेगका नागरिकलाई घरदैलोमै स्वास्थ्य सेवा दिने उद्देश्यले गरिएको कार्यक्रम सह्रानीय भएको बताए ।

समाज परिवर्तनका निम्ति स्थानिय सरकारको प्रयासले मात्र सम्भव नहुने बताउँदै निजी तथा सार्वजनिक संघ संस्थाबाट पनि सहयोग सहकार्य अपरिहार्य रहेको बताए ।

खत्री नर्सिङ होमका डा. डिबि खत्री, क्रिमशन अस्पतालका डा. डा. शेखर प्रसाद पोख्रेलले आफुहरुले समय समयमा सजिलै स्वास्थ्य सुबिधा उपलब्ध नभएका ग्रामीण भेगमा स्वास्थ्य शिविर आयोजना गरिरहेक बताउँदै आफुहरु शिविरहरु मार्फत निरन्तर रुपमा सहयोग गर्न तत्पर रहेको बताए ।

कार्यक्रममा सत्यवती गाउँपालिका प्रमुख प्रशासकीय अधिकृत कमलप्रसाद भुसाल, सत्यवती ७ का वडा अध्यक्ष लोकबहादुर बुढाथोकी, वडा नं. ५ का वडा अध्यक्ष बाबुराम ज्ञवाली, मानव अधिकार तथा शान्ति समाज रुपन्देही एवं चिदिपानी तिलोत्तमा समाजका अध्यक्ष कृष्ण प्रसाद भट्टराई (खिम), जुनिया माविका प्रधानाध्यापक केशव भट्टराई, समाज कोषाध्यक्ष ओमप्रकाश भण्डारी लगायतले आफ्नो भनाइ राखेका थिए ।

कार्यक्रममा समाजका उपाध्यक्ष सुरेश थापा, सचिव खिम खत्रीलगायतले पनि आफ्नो धारणा राखेका थिए ।