खोज

काठमाण्डौ, १७ असोज । नेपालले चीनमा जारी १९ औं एसियाली खेलकुदमा कांस्य पदक जित्ने निश्चित भएको छ । महिला कबड्डीको समूह ‘बी’ मा इरानले बुधबार बंगलादेशलाई ५६–१६ ले हराएपछि नेपालको भाग्य खुलेको हो ।

पहिलो हाफमा इरान २८–५ ले अगाडि रहेको थियो । यस समूहमा लिग चरणका सबै खेल सकिएका छन् र त्यसमा इरान लगातार दुई खेल जित्नै शीर्ष स्थानमा रह्यो । पछिल्लो एसियाली खेलकुदको पनि महिला कबड्डीमा स्वर्ण जितेको इरानले यसअघि नेपालाई पनि हराएको थियो । नेपालले भने आफ्नो पहिलो खेलमा बंगलादेशलाई हराएको हो ।

यस नतिजाका कारण नेपाल समूहको दोस्रो स्थानमा रहेर सेमिफाइनल पुगेको छ । सेमिफाइनल प्रवेश कांस्य पदकका लागि पर्याप्त रहेको छ । महिला कबड्डीको अर्को समूहको शीर्ष दुई टिम निश्चित भएपछि नेपालको त्यस चरणमा प्रतिद्वन्द्वी निश्चित हुनेछ ।