खोज

नाम : भुवन खराल
ठेगाना : छत्रकोट गाउँपालिका–१ हुँगा गुल्मी ।
उमेर : २५ बर्ष
पढाइ : वि.ए.पास
युवा उमेरका उनलाई नत कुनै सहरिया प्रवृत्तिले छोयो नत दक्षिण कोरिया मोहले नै । उनको ध्यान कृषिमै गयो, त्यसमा पनि आफ्नै गाउँको पाखाबारीमा । उमेरले भर्खरै २५ बर्षमा लागेका भुवन खरालको उमेर चुलबुले युवा उमेर हो । तर उनी विगत ४ बर्षदेखि आफ्नै पाखाबारीमा तरकारी स्याहार्दैमा व्यस्त छन् । साथीहरूले वैदेशिक रोजगारीमा गएर यति कमाए, उती कमाए भन्दै कहिलेकाँही ईन्टरनेट कुराकानीमा उनलाई भन्ने गर्दछन् । तर उनी आफ्नै पसिनाले सृजिएको भूमिबाट आएको आम्दानीबाट खुसी छन् । उनी भन्छन्–‘बर्षमा ९÷१० लाख कमाउनको लागि कहिँ कतै जानुपर्दैन, के कोरिया यहिँ भएन र ? ’ साथीहरूले कोरियाको सपनाको कुरा गर्दा उनले आफ्नै पाखाबारी ‘खोरियाको कुरा गर्न बिर्सदैनन् । उनी थप्छन्–‘खुर्सानी, टमाटर, काउली नै मेरा साथी हुन, उनीहरूबाट नै मलाई सन्तुष्टी मिलेको छ । ’
गुल्मी जिल्लाको छत्रकोट–१ का हुंगाका २५ वर्षीय भुवन खरालले पाखा बारी भरी २२ हजार खुर्सानी रोपेका छन् । ९ रोपनीमा टमाटर र १२ रोपनीमा खुर्सानी रोपेर खुर्सानी कृषकको रूपमा पहिचान बनाएका छन् । वार्षिक १० हजार तिर्नेगरी लिजमा १२ रोपनी जग्गा समेत लिएका उनी एक्लैले बारीभरी खुर्सानी रोपेका हुन् । युवा उद्यमी किसानको रूपमा पहिचान बनाउन सफल खरालले ५ जनालाई रोजगारी दिएका छन् ।
भिरालो जग्गा भएपनि पाखाबारीमा उनले खुर्सानी रोपेका छन् । उत्पादन भएको कृषि उपज बिक्री गर्न उनलाई कुनै पनि समस्या छैन । गाउँमा खोलिएको पंैचो पसल प्रालिले नै खुर्सानी लिने गरी सम्झौता नै गरेको छ । उनी भन्छन–‘विदेश जान पनि सक्थँे, तर यहि नै आफ्नै माटोमा केही गर्नको लागि कृषि क्षेत्रमा हात हालेको हुँ ।’
उनले यस बर्ष खुर्सानी मात्रै ६ लाख रूपैयाँ बराबरको बिक्री गर्ने अपेक्षा लिएका छन् । यस्तै अन्य बन्दा, काँक्राबाट ३ लाख गरी यो बर्ष ९ लाख आम्दानी गर्ने उनको अपेक्षा छ । गत बर्ष पनि सोही अनुपातमा उनले आम्दानी गरेका थिए । उनको बारीमा २२ हजार बोट खुर्सानी छन् भने काउली ५४ सय बोट र काँक्रा २ हजार बोट छन् ।
निर्वाहमुखी खेति गरेर जीवन गुजारा गरिरहेका पहाडी र उच्च पहाडी क्षेत्रका किसानहरूलाई ब्यवसायिक खेती गराउनको लागि यसरी पैचो पसल प्रालि सुरु गरिएको प्रबन्ध निर्देशक धु्रब न्यौपाने बताउँछन् । उनका अनुसार २०७१ जेठ ७ गते पैंचो स्थापना भएको हो ।
सुरुमा गुल्मी, पाल्पा र अर्घाखाँचीका कृषकहरूबाट उत्पादित तथा संकलित कृषिजन्य वस्तुहरू फलफूल, तरकारी, दलहन, नगदेवाली तथा जडिबुटी खरिद गरी उपभोक्तालाई सुलभ मूल्यमा बिक्री गर्ने उद्देश्यले खोलिएको उनको भनाइ रहेको छ । प्रसिद्ध धार्मिक स्थल गुल्मीको रुरु गाउँपालिकाको रिडी बजार नजिकै स्थापित पैंचो प्रशोधन उद्योगले जुस, जाम, सस, अचार, आटो, पिठो, सिन्की, मस्यौरा, केचप, फ्रोजन भेटिजेवल लगायत दर्जनौं कृषिजन्य वस्तुको उत्पादन र प्रशोधन गरिरहेको छ ।
प्रबन्ध निर्देशक न्यौपाने भन्छन्–‘पैंचो पसलले गुल्मी, पाल्पा र रूपन्देही गरि ८ पैंचो पसलका शाखा र १८ पैचो संकलन केन्द्रहरू संचालन गरेको छ ।’
गुल्मीको तम्घास र पाल्पाको तानसेनमा अत्याधुनिक डिपार्टमेण्ट स्टोर्स संचालन गर्दै आएको छ भने रूपन्देहीको बुटवलमा पश्चिम नेपालकै पहिलो तरकारी र फलफूलको सपिङ कम्प्लेक्स संचालन गरेको छ । गुल्मीमा मात्रै ४० हजार हेक्टर भूमिमा कृषकहरू कृषि उत्पादनमा सहभागी भइरहेका छन् ।