खोज

कसौधन सेवा समिति बुटवल रुपन्देहीको सातौ साधारण सभा तथा पाँचौ अधिवेशन भएको छ ।
सेवा समितिसँगै कसौधन युवा समिति र महिला समितिको पनि साधारण सभा तथा अधिवेशन एकै साथ भएको हो । अधिवेशनको उद्घाटन गर्दै बुटवल उपमहानगरपालिकाका मेयर शिवराज सुवेदीले सबै जातजाति धर्म संस्कृतिको संरक्षणको दायित्व सबैको हुने भएकाले आफ्नो धर्मसंस्कृतीको संरक्षणमा कसौधन सेवा समितिले महत्वपुर्ण भुमिका खेलेको बताए ।
उनले नगरभित्र रहेका विभिन्न वर्ग, समुदाय र जातजातिको धर्म संस्कृती संरक्षणमा नगरपालिको भूमिका अतुलनीय रहने बताए । कार्यक्रममा समितिका संरक्षक तथा पुर्व सभासद् आदित्य नारायण कसौधन सामाजिक सद्भाव, एकता र भाईचारा स्थापान गर्न यस्तो प्रकृतिको समिति आवश्यक रहेको बताएका थिए । उनले एक अर्कामा दुख सुख पर्दा पनि यस्तो प्रकृतिको सेवा समितिको थप महत्व रहेको धाराणा राखेका थिए ।
कसौधन सेवा समितिका अध्यक्ष अजय कुमार कस्यपले सबैको सहकार्य भएमा सेवा समितिले नमुना कार्य गर्न सक्ने धारणा राखेका थिए ।
कार्यक्रममा जवरलाल कसौधन, महिला समितिका अध्यक्ष पुस्पा कसौधन, युवा समितिका अध्यक्ष विश्वजित कसौधन, कार्यक्रम संयोजक महादेव कसौधन, सचिव अनिस कसौधनलगायतले कसौधन समु्दायका सदस्यहरुलाई समितिले गोलबद्ध गरेर सदस्यहरुको नेतृत्व, ब्यक्तित्व र सामाजिक उत्तरदायित्व बहनमा जवाफदेहि बनाउन सक्षम बनाएको बताएका थिए ।
महिला सेवा समितिका अध्यक्ष पुष्पा कसौधनले बुटवलको सरस्वती आधारभूत विद्यालयका ५ जना विपन्न तथा गरिव विद्यार्थीहरुलाई जनहि दुई हजारका दरले छात्रवृति प्रदान गरेकी थिईन् ।