खोज

बुटवल, ४ माघ ।

लुम्बिनी बोर्डिङ स्कुलमा खेल महोत्सव सुरु भएको छ । बुटवलमा शैक्षिक र खेलकुद गतिविधिमा नमुना विद्यालयले ३ दिने खेलकुद सुरु गरेको हो । एक कार्यक्रमका बीच बुटवल वडा नं. ३ का कार्यबाहक वडाअध्यक्ष हरिनारायण मिश्रले उदघाटन गर्दै अतिरिक्त क्रियाकलापको रुपमा मात्र नभई अनिवार्य क्रियाकलाप बनाउनुपर्ने सुझाव दिए ।

बालबालिकाहरुलाई पढाईसंँगै खेलकुद गतिविधिमा आवद्ध गराएर उनीहरुमा लुकेको प्रतिभा प्रष्फुटन गराउन सकिने उनले बताए । मानिसमा अनुशासन बिना सफलता नमिल्ने भन्दै अनुशासन र असल संगत सधै जरुरी हुने उनले बताए ।

कार्यक्रममा लुम्बिनी बोर्डिङ स्कुलका अध्यक्ष कृष्ण गौतमले विद्यालय बालबालिकाको सिकाई गर्ने थलो भएको भन्दै शिक्षा र खेलकुद गतिविधिबाट बालबालिकाहरुको भविष्य निक्र्यौल गर्न मद्दत मिल्ने बताए ।

कार्यक्रममा लुम्बिनी बोर्डिङ स्कुलका प्राचार्य लालहरि पाण्डे, उपप्राचार्य कौशल बस्याल, गोलपार्क प्रहरी बिटका प्रमुख मेख बहादुर लामटार, संयोजक सुदिप बस्यालले सानै उमेरबाट खेलकुदमा जोडिदा यसबाट दक्ष खेलाडी उत्पादन गर्न मिल्ने बताए ।

कार्यक्रममा अतिरिक्त क्रियाकलाप गणेश चौधरीले बालबालिकाहरुको अन्तरनिहित प्रतिभा प्रस्फुटनका लागि विद्यालयको कक्षागत रुपमा प्रि नर्सरी, जुनियर, सिनियर गरी समूहगत रुपमा ब्लाईड शुट, टक अफ वार, सेक रेस, हट पोटाटो, टेबलटेनिस, स्लो साईकल लेस, बेलुन ब्लास्ट, बल थ्रो, थ्रि लेगरेस, ब्याडमिन्टन , म्युजिकल चेयर, एक सय, २ सय मिटर दौड, क्वाईन एण्ड पाउडर, मेमोरी टेष्ट, भलिबल प्रतियोगिताहरु संचालन हुने बताए ।

यसैबीच खेल महोत्सवको पहिलो दिन विद्यार्थीहरुबाट मार्च पास कार्यक्रम गरिएको छ । विद्यालय परिसरबाट सुरु गरिएको मार्चमास गोलपार्क, चिडियाखोला परिक्रमा गरी पुनः विद्यालयमा समापन गरिएको थियो ।