खोज

बुटवल, २ माघ ।

बुटवल उपमहानगरपालिका वडा नं. ९ अन्तर्गत मिलनटोल विकास संस्थाको २१ औंं वार्षिक साधारण सभा तथा नवौं अधिवेशन सम्पन्न भएको छ । स्थानीय रुपमा उपलब्ध श्रम, सीप, साधन र अवसरहरुलाई अधिकतम परिचालन गर्दै वडा तथा नगरको सामाजिक तथा आर्थिक ब्यवस्थालाई एक अर्काको रुपमा विकसित गर्दै गरिबी न्युनीकरण प्रयासमा ठोस योगदान पु¥याउनु तथा आफ्नो टोलको समग्र विकास गर्ने वातावरण सिर्जना गर्ने उद्देश्यका साथ मिलन टोल विकास संस्था गठन भएको संस्थाका अध्यक्ष कमला बस्नेत कुँवरले जानकारी दिईन् ।

यस संस्थाले स्थापना कालदेखि नै आफ्नो टोलबासीहरुको बीचमा बचत गर्ने बानीको विकास गराउने, आवश्यक पर्दा ऋण सहयोग गर्ने, आफ्नो टोलबासीहरुको समस्या र विकासका लागि सम्बन्धित निकायमा पहलकदमी गर्दै समन्वयकारी भूमिका निर्वाह गर्दै आएको अध्यक्ष कुँवर बताइन् । १४१ घरधुरी सदस्य रहेको उक्त संस्थाको शनिवार सम्पन्न अधिवेशनले तीन बर्षका लागि पुनः कमला बस्नेत कुँवरलाई सर्वसम्मत अध्यक्ष निर्वाचित गरेको छ ।

यस्तै उपाध्यक्षमा माया रायमाझी खड्का, सचिवमा रुपा बस्याल, कोषाध्यक्षमा बिष्णु बन्जाडे, सहसचिवमा शोभा खड्का र सदस्यहरुमा सकुन्तला भण्डारी, सिन्धु जिसी, किरण शाक्य, बिष्णुसरा राम्जाली, रमणी श्रेष्ठ, यशोदा थैव, जमुना भूसाल, लाड्ली श्रेष्ठलाई सर्वसम्मत निर्वाचित गरेको निर्वाचन समितिका संयोजक यमलाल खनालले जानकारी दिए । कार्यक्रममा बुटवल उपमहानगरपालिका वडा नं. ९ का वडाअध्यक्ष प्रदिप कुमार श्रेष्ठले बुटवल ९ भित्र रहेका १३ वटा टोल विकास संस्थाहरु मध्ये सबै भन्दा पुरानो र टोलवासीहरुलाई सेवा दिने मध्ये सबै भन्दा उत्कृष्ट टोल मिलन टोल विकास संस्था रहेकोले वडाको तर्फबाट पुरस्कृत गरिने घोषाणा गरेका थिए ।

कार्यक्रममा वडा सदस्य विवेक पुरी, इन्दिरा ज्ञवाली, सुर्य बहादुर कार्की, सामुदायिक विकास तथा वातावरण समितिका अध्यक्ष, भरतराम भट्टराई, सामाजिक बहुउद्देश्यीय संस्थाका अध्यक्ष भोज बहादुर बुढाथोकी, सल्लाहकारहरु नवराज कुँवर, प्रिया गुरुङ लगायतले वडा तथा टोलको विकासका सन्दर्भमा आफ्नो धारणा राखेका थिए ।