खोज

बुटवल, ८ फागुन । कीर्तिपुर नगरपालिकाको आयोजनामा जारी राष्ट्रव्यापी अन्तर स्थानीय तह यू–१८ मेयर कप बास्केटबल प्रतियोगितामा लगातार दोस्रो जितसहित आयोजक कीर्तिपुर नगरपालिका क्वाटरफाइनल प्रवेश गरेको छ । कीर्तिपुरले दाङको घोराही उपमहानगर टिमलाई ९४–६८ स्कोरले पराजित गरेको हो । टोली समूह ‘डी’ को विजेता बन्यो । कीर्तिपुरका आशिष थापा मगरले १६ स्कोर जोडे । यसअघि कीर्तिपुरले बुटवल उपमहानगरपालिकालाई १००–७३ स्कोरले पराजित गरेको थियो ।

नेपाल बास्केटबल संघको प्राविधिक सहयोग तथा कीर्तिपुर नगर खेलकुद र कीर्तिपुर बास्केटबल संघको सहकार्यमा कीर्तिपुरको नयाँबजारस्थित कभर्डहलमा जारी प्रतियोगितामा सोमबार बुटवलले दाङमाथि ७६–५४ स्कोरको जित निकाल्यो । यसैगरि नागार्जुन नगरपालिका, कास्कीको अन्नपूर्ण गाउँपालिका र भक्तपुर नगरपालिका विजयी भए । नागार्जुनले म्याग्दीको अन्नपूर्ण गाउँपालिकामाथि ६७–६४ ले हराएर प्रनिश तिमल्सिनाले २१ स्कोर जोडे । अन्नपूर्णले विराटनगर महानगरपालिकालाई ६८–३४ ले हरायो । ओमकार रखालले १८ स्कोर बटुलेका थिए । भक्तपुरले पाँचखाल नगरपालिकालाई ६७–६४ ले पराजित गरेको छ ।

फागुन ६ देखि शुरु भएको प्रतियोगितामा १६ पुरुष टिम सहभागीता रहेको संयोजक विजयप्रकाश महर्जनले बताए । सहभागी टिमलाई ४ समूहमा विभाजन गरी लिगकम नकआउट आधारमा खेलाइएको छ । विजेताले १ लाख र उपविजेताले ५० हजार रुपैयाँ पुरस्कार पाउने छन् । मोस्ट भ्यालुएबल प्लेयरलाई १० हजार रुपैयाँले पुरस्कृत गरिने छ । गत वर्ष म्याग्दीको अन्नपूर्ण गाउँपालिकाले उपाधि जितेको थियो ।