खोज

बुटवल,३० साउन । पेट्रोलपम्प व्यवसायीको छाता संस्था पेट्रोलियम डिलर्स राष्ट्रिय एसोसिएसन विभिजित भएको छ । देशभरका १५ सयभन्दा बढी व्यवसायी आबद्ध भएको संस्था विभाजित भई केदारप्रसाद पाठकको अध्यक्षतामा पेट्रोलियम व्यवसायी संघ नेपाल गठन गरिएको छ। संघको कार्यवाहक अध्यक्षमा रुपन्देहीका राजेन्द्रप्रसाद गुप्ता रहेका छन् । गुप्ता पश्चिमाञ्चल पेट्रोेलियम डिलर्स एशोसिएसनका पुर्व अध्यक्ष हुन् ।

संघको तदर्थ समिति मात्रै गठन भएको र चाँडै देशभरका पम्प व्यवसायीलाई समेटेर अधिवेशन गर्ने तयारी भएको नवगठित संघका महासचिव आत्माराम थापाले जानकारी दिए। डेढ वर्षअघि भएको एसोसिएसनको महाधिवेशमा लिलेन्द्र प्रधान अध्यक्ष र विश्व अर्याल महासचिव भएका थिए।

पम्प व्यवसायीको छाता संगठन भएर व्यवसायीको हक, हितमा काम गर्न नसकेको, वीमाको रकम अपारदर्शी भएको लगायतका आरोप लगाउंदै व्यवसायीहरू विभाजित भएका छन्।

वर्तमान कार्यसमितिको काम, कारबाहीलाई लिएर असन्तुष्ट हुने व्यवसायीको संख्या बढेपछि अर्को संगठन स्थापना भएको हो । तदर्थ समितिमा हाल बागमती प्रदेशका व्यवसायी मात्रै समेटिए पनि अधिवेशनले संघलाई राष्ट्रियस्तरको संगठन बनाउने गरी कार्यसमिति चयन हुने थापाले बताए।

संघको पहलमा बुधबारदेखि मूल्य अभिवृद्धि कर भ्याटमा आधारित ट्रान्जिट बिमा पनि सुरु हुने उनले जानकारी दिए।

विगत ८ वर्षदेखि एसोसिएसनको नेतृत्व गरिरहेका अध्यक्ष प्रधानले भने केही साथीहरूको असन्तुष्टि देखिएको र समाधानका लागि पहल भइरहेको बताए । तर नयां संस्था नै गठन भइसकेकाले अब पछि हट्ने सवाल नभएको बरु एशोसिएसनका धेरै व्यवसायी संघमा आवद्ध हुने कार्यवाहक अध्यक्ष गुप्ताले भने ।