खोज

बुटवल,२६ माघ । क्यानन माध्यमिक विद्यालय बुटवल ८ सुख्खानगरमा विज्ञान प्रदर्शनी , खाना महोत्सव र खेल सप्ताहका कार्यक्रम भएका छन् । विद्यालयको २७ औ वार्षिक उत्सवको पूर्वसन्ध्यामा खेल सप्ताहको उद्घाटन तथा खाना महोत्सव र विज्ञान प्रदर्शनी भएको हो । विज्ञान प्रदर्शनी कक्षा ११ र १२ का विज्ञान संकायका विद्यार्थीले आयोजना गरेका हुन् । जसमा १० स्टल रहेका थिए ।

यस्तै होटेल म्यानेजमेन्टको कक्षा ११ र १२ का विद्यार्थीले राखेको खाना महोत्सवमा ६ स्टल रहेका छन् । खेलकुद सप्ताहमा प्ले ग्रुपदेखि कक्षा १२ सम्मका विद्यार्थीको सहभागितामा विविध खेलकुद हुनेछन् । जस अन्तर्गत पूर्व प्राथमिक तहदेखि कक्षा १२सम्मका बिद्यार्थीबीच तहअनुसारका खेल हुनेछन् । जसमा दौड, कबड्डी, फुटबल, कुर्ची दौड, क्रिकेट खोखो, ब्याड्मिन्टन, भलिबल लगायतका खेल हुने खेल संयोजक सुमन गिरी तथा विद्यालयका अतिरिक्त क्रियाकलाप प्रमुख मिनराज गिरीले जानकारी गराए ।

कार्यक्रममा बोल्दै विद्यालय व्यवस्थापन समितिका अध्यक्ष थानेश्वर पौडेलले विद्यालयले पाठ्यक्रमको ज्ञानसंगै विद्यार्थीको शारीरिक तथा मानसिक विकासका लागि खेलकुद प्रतियोगिता र अतिरिक्त क्रियाकलापलाई पनि उत्तिकै प्राथमिकता दिएको बताए ।
संस्थाका प्राचार्य डा. शामूएल आर सम्पथले खेलकुदले विद्यार्थीलाई अनुशासित बनाउँदै उनीहरुको व्यक्तित्व विकासमा महत्वपूर्ण भूमिका खेल्ने बताए ।
विद्यालयका सहप्राचार्य सुर्य पाण्डेले विज्ञान प्रदर्शनी र खाना महोत्सवमा सहभागी विद्यार्थीले आफूले कक्षा कोठामा सिकेको ज्ञान व्यवहारमा उतार्न सफल भएको बताए । उनले फागुन ५ गते विद्यालयले २७ आंै वार्षिक उत्सव मनाउन थालेको बताए ।