खोज

घोराही १४ का एक युवाले निशुल्क मास्क वितरण अभियानको शुरूवात गरेका छन् । कोरोना महामारीका बेला मास्क लगाउनु अनिवार्य भएपनि कतिपय विपन्न व्यक्ति तथा सडकमा हिडडुल गर्ने मास्क नलगाएको देखेपछि व्यक्तिगत लगानीमा युवा समाजसेवी नरेन्द्र पुनले निःशुल्क मास्क वितरण गर्न शुरू गरेका हुन् ।

घोराही उपमहानगरपालिका १४ स्थित लखनपार्क भन्दा उत्तरतर्फ रहेको आफ्नै घरको परिसरमा उनले मास्क बैंक स्थापना गरेका छन् । धेरै व्यक्ति मास्क नलगाएर बजारमा हिड्ने गरेको र कोरोना संक्रमणको जोखिममा पर्ने खतरा रहेकाले बिपन्न नागरिकले पनि मास्क लगाउन पाउन् भनेर मास्क बैङ्क स्थापना गरेको उनले बताए । “यो मास्क बैङ्क हो, यहाँ सहयोग गर्न चाहनेले मास्क दिएर जान सक्छन् भने नभएकाले मास्क लिएर जान्छन्” पुनले भने । आज मात्रै ५ सय थान मास्कबाट अभियानको थालनी गरेका पुनलाई सहयोगीहरु पनि भेटिदै भएका छन् । २ जना व्यापारीहरुले २ सय मास्क दिएर गएका छन् भने अरुले पनि सहयोग गर्ने बचन दिएको उनले जानकारी दिए । बुधवार मात्रै ४ सय जनालाई मास्क वितरण गरेको उनले बताए ।

कोरोनाको संक्रमण बढिरहेको समयमा घरवाहिर हिडडुल गर्दा मास्क नलगाउनेको संख्या धेरै नै रहेको छ । त्यस्तै पुनले स्थापना गरेको मास्क बैङ्क रोल्पावाट दाङ झर्नेहरुको बाटो पर्ने भएकोले पनि मास्क नलागाउनेको संख्या बढि भएको पुनले बताए । “ मास्क नगाएकालाई मास्क खोई भन्दा कसैले पकेटमा छ त कसैले घरमा छ भन्ने जवाफ दिन्छन्” पुनले भने ।