खोज

काठमाडौं,२३ बैशाख । एक सयको नोटमा नेपालको चुच्चे नक्सा राख्ने नेपाल सरकारको निर्णयमा भारतले असन्तुष्टि जनाएको छ।

भारतीय विदेशमन्त्री एस जयशंकरले नेपाली सय रुपैयाँको नोटमा चुच्चे नक्सा राख्ने नेपाल सरकारको निर्णय एकपक्षीय भन्दै असन्तुष्टि जनाएका हुन्।

पत्रकारले राखेको जिज्ञासामा उनले नेपालले गरेको एकल निर्णयको अर्थ नभएको बताए । सीमा क्षेत्र र नक्साका विषय दुई देशीय विषय भएकाले नेपालले गरेको एकल निर्णयको अर्थ छैन, धरातलीय यथार्थताका आधारमा निर्णय गर्नुपर्ने उनको तर्क थियो । गत बिहीबार बसेको मन्त्रिपरिषदले एक सय रूपैयाँको नोटमा चुच्चे नक्सा छाप्ने निर्णय गरेको थियो। लिम्पियाधुरा, लिपुलेक र कालापानी समावेश गरिएको चुच्चे नक्सा राख्न सरकारले नेपाल राष्ट्र बैँकलाई स्वीकृति दिएको छ।

नेपालको संसदले झण्डै शतप्रतिशत मतले पारित गरेपछि २०७७ जेठ ७ गते सरकारले लिम्पियाधुरा, लिपुलेक र कालापानी क्षेत्र समेटिएको नेपालको नयाँ राजनीतिक नक्सा जारी गरेको थियो। तर भारतले उक्त भूभाग आफ्नो दाबी गर्दै त्यहांबाट आफ्नो सेना हटाएको छैन ।

Photo : File