खोज

काठमाडौं,११ बैशाख । आज १८ औं लोकतन्त्र दिवस विभिन्न कार्यक्रम गरी मनाइँदै छ । तत्कालीन राजा ज्ञानेन्द्र शाहको प्रत्यक्ष शासन अन्त्य भएको दिनका रूपमा वैशाख ११ लाई लिने गरिएको छ । सोही दिनको स्मरणमा हरेक वर्ष वैशाख ११ लाई लोकतन्त्र दिवसको रुपमा मनाउने गरिन्छ ।

सात राजनीतिक दल र तत्कालीन विद्रोही नेकपा माओवादीसमेतको सहभागीतामा २०६२–६३ को जनआन्दोलन उत्कर्षमा पुगेपछि जनताको शक्तिका सामु राजतन्त्रले घुँडा टेक्दै तत्कालीन राजा ज्ञानेन्द्र शाहले विघटित प्रतिनिधिसभाको पुनःस्थापना गरेका थिए । सोही घोषणाअनुसार पुनःस्थापित संसद्को जेठ ४ गतेको बैठकले राजसंस्थालाई निलम्बन गर्दै कार्यवाहक राष्ट्राध्यक्षको अधिकारसमेत प्रधानमन्त्रीलाई दिएको थियो ।

२०५९ साल जेठ ८ मा विगठन भएको संसद आन्दोलनरत दलको मार्गचित्र बमोजिम विसं २०६३ वैशाख ११ गते पुनर्स्थापना भएपछि विसं २०६४ देखि देशभर लोकतन्त्र दिवस मनाउन थालिएको हो ।

लोकतन्त्र बहाली भएको १८ वर्षमा लाग्दा पनि जनताका अपेक्षाहरु पूरा भएका छैनन् । दलहरु नागरिकलाई महंगी ,बेरोजगारीबाट मुक्त गराउने, राहत दिने सट्टा सत्ताको खेलमा लिप्त भएकाले नागरिकमा असन्तुष्टी बढ्दो छ ।

संविधान सभाबाट संविधान बनेर तीन तहका सरकार कार्यान्वयनमा आएपनि सुशासन कायम हुन नसकेको र भ्रष्टाचार व्याप्त भएको, रोजगारीका लागि हरेक दिन झण्डै तीन हजारले देश छाडेर विदेश जानुपर्ने वाध्यता, आकाशिंदो ब्यापार घाटा आदि कारणले जनताको अवस्था उस्तै रहेको तर दलका नेताहरु र उनीहरुका निकटका व्यक्तिले मात्रै लाभ लिएको भन्दै लोकतन्त्रप्रति आम नागरिकमा खासै उत्साह देखिएको छैन ।

Photo : File