खोज

सल्यान, २८ चैत । सल्यानमा आज बुधबारदेखि क्रिकेट प्रतियोगिता सुरु हुंदै छ । शारदा नगरपालिकाले सञ्चालन गर्न लागेको अन्तरपालिका स्तरीय शारदा मेयर टि–२० कप क्रिकेटको तयारी पुरा भएको नगरपालिकाले जनाएको छ । नगरप्रमुख प्रकाश भण्डारीले २०८० चैत २८ गते देखी २०८१ बैशाख ३ गतेसम्म सञ्चालन हुने शारदा मेयर टि–२० कप क्रिकेटको सम्पुर्ण तयारी पुरा भएको जानकारी गराए । प्रतियोगितामा जिल्लाको कुमाख गाउँपालिका र दार्मा गाउँपालिका बाहेक बाँकी ८ वटै स्थानिय तहको सहभागिता रहने छ ।

देशभरमा नै क्रिकेटको माहोल बढ्दै गएको अवस्थामा तल्लो तहमा पनि क्रिकेटका गतिविधि बढाउन र क्रिकेट खेलाडीको प्रोत्साहन गर्न प्रतियोगिता आयोजना गरिएको नगरपालिकाले जनाएको छ ।

नगर प्रमुख भण्डारीले प्रतियोगिताको विजेटा टिमले एक लाख रुपैँया र उपविजेता टिमले ५० हजार रुपैँया पुरस्कार पाउने जनाए । जसमा प्लेयर अफ म्याच, प्लेयर अफ द सिरिज, वेष्ट बलर, वेष्ट ब्याट्सम्यान, वेष्ट किपर लगाएतका विधामा पनि पुरस्कृत गरिने उनको भनाइ छ ।

क्रिकेट प्रतियोगिताको व्यवस्थापन क्रिकेट संघ सल्यानले गरेको छ । प्रतियोगितामा सहभागि भएका ८ वटा पालिकालाई दुई समुहमा विभाजन गरेर आइसिसिको नियमअनुसार लिग चरणमा खेल हुने छ । जसमा समुह ए मा बन्गाड कुपिण्डे नगरपालिका, कपुरकोट गाउँपालिका, बागचौर नगरपालिका र कालिमाटी गाउँपालिका छन् । यस्तै समुह वि मा सिद्ध कुमाख गाउँपालिका, छत्रेश्वरी गाउँपालिका, शारदा नगरपालिका र त्रिबेणी गाउँपालिका रहेका छन् ।

लिग चरणमा फाइनल सहित १३ वटा खेल हुने जिल्ला क्रिकेट संघ सल्यानका अध्यक्ष तथा शारदा नगरपालिका–२ का वडाअध्यक्ष सविन हमालले जानकारी दिए । दुबै समुहबाट पहिलो हुने २ टिम फाइनलमा उपाधिका लागि भिड्ने छन् ।

शारदा मेयर टि–२० कप क्रिकेट प्रतियोगिता शारदा नगरपालिका–२ स्थित लुहापिङ खेलमैदानमा हुने छ । प्रतियोगितामा प्रत्येक टिमबाट १६÷१६ जना खेलाडी सहभागि हुने छन् । प्रतियोगिता अवधिभर करिब २० लाख बढीको आर्थिक कारोवार हुने अपेक्षा गरिएको नगरपालिकाले जनाएको छ । प्रतियोगिताको बुधबार बिहान साढे ११ वजे पुर्व गृह राज्यमन्त्री देबेन्द्रराज कडेँलले उद्घाटन गर्ने कार्यक्रम छ । शारदा नगरपालिकाले विनियोजन गरेको ५ लाख रुपैँयाबाट प्रतियोगिता सञ्चालन गर्न थालिएको हो । यससँगै अवको केही सातापछि मेयरकप भलिवल प्रतियोगिता सञ्चालन गर्ने नगरपालिकाले जनाएको छ ।