खोज

बुटवल, २७ चैत ।

ज्येष्ठ नागरिकहरुलाई लक्षित गरि मणिमुकुन्द सेन उद्यान फुलबारीमा सन्चोबिसन्चो पौवा निमार्ण हुने भएको छ । परिवारमा अधिकांश सदस्य वैदेशिक अध्ययन र रोजगारमा हुदा घरमा एक्लिएका ज्येष्ठ नागरिकहरुलाई लक्षित गरि सन्चोबिसन्चो पौवा निमार्ण गरिने भएको हो ।

उद्यान परिसरमा रहेको पाँच सय वर्ष पुरानो शिवालय मन्दिरको नजिकमा पौवा निमार्ण हुने छ । जहाँ ज्येष्ठ नागरिकहरु जम्मा भएर भजनकिर्तन, एकआपसमा भलाकुसारी गर्ने वातावरण तयार गरिने उद्यानका अध्यक्ष माधव प्रसाद नेपालले बताए । रुपन्देहीको उत्कृष्ट पर्यटकिय गन्त्ब्य मणिमुकुन्द सेन उद्यान फुलबारीमा सन्चोबिसन्चो केन्द्र थप आर्कषण र सामाजिक उत्तरदायित्वका रुपमा महत्वपूर्ण हुने उनले बताए । २४ फुट लम्बाइ र १२ फुट चौडाईको पुरानो पौवाको शैलीमा सन्चो बिसन्चो केन्द्र तयार गरिने उनले बताए ।

एक कार्यक्रमका बिच मंगलबार बुटवल उपमहानगरपालिकाका नगरप्रमुख खेलराज पाण्डेयले सन्चो बिसन्चो केन्द्रको शिलान्यास गर्दै सबै वर्ग र उमेरका पर्यटकलाई रमणीय स्थलका रुपमा फुलबारी बनेको बताए । बच्चाहरुलाई चिल्ड्रेनपार्क, चिडियाघर, युवाहरुलाई विभिन्न अध्ययन गर्न सकिने पुरातात्विक स्थलका साथै पिकनिक स्पटहरु तथा ज्येष्ठ नागरिकहरुलाई समेत समय कटाउन सक्ने गरि सन्चोबिसन्चो केन्द्र स्थापना हुने उनले बताए । देश र समाज विकासमा जिवनका उर्जावान समय खर्चेका ज्येष्ठ नागरिकहरुको सम्मान स्वरुप पालिकाबाट विभिन्न कार्यक्रमहरुमार्फत सम्बोधन गरिरहेको उनले बताए । बाआमासंगै नगरप्रमुख कार्यक्रममार्फत ज्येष्ठ नागरिकहरुलाई घरदैलोमा स्वास्थ्य परिक्षण तथा औषधी वितरण गरिएको छ ।

कार्यक्रममा बुटवल उपमहानगरपालिका वडा नं. २ का वडा अध्यक्ष श्री सुनिल शाक्य, उद्यानका निवर्तमान अध्यक्ष खेम प्रसाद लुइँटेलले पर्यटकिय स्थलमा सबैको अपनत्व हुने गरि फुलबारीमा नयानया अवधारणाहरु बनाईएको बताए । घरमा एक्लो भएका ज्येष्ठ नागरिकहरुलाई सन्चोबिसन्चो पौवा धेरै नै उपयुक्त हुने दाबी गरे ।

कार्यक्रममा उद्यानका महासचिव युवराज घिमिरेले बुटवल उपमहानगरपालिकाको १० लाख रुपैया तथा उद्यानको १ लाख ५० हजार रुपैया लागत साझेदारीमा आगामी जेठ १५ गते भित्र निर्माण सम्पन्न गरिने लक्ष्य रहेको बताए ।