खोज

बुटवल, २० चैत ।

रुपन्देहीमा सम्पन्न छैटो खड्ग प्रसाद गौचन स्मृति यु १९ को उपाधि धनगढीले चुमेको छ । एक्स्ट्रा टेक ओभल क्रिकेट मैदानमा मंगलबार भएको फाईनल खेलमा पल्सर सिईसी काठमाडौंलाई १२ रनले पराजित गर्दै धनगढीले उपाधि हात पारेको हो । उपाधिसंगै धनगढीले नगद ५० हजार रुपैयाँ, कप, मेडल, प्रमाणपत्रबाट पुरस्कृत भएको छ । सिईसी भने २५ हजार नगद, कप, मेडल, प्रमाणपत्रमा चित्त बुझायो । प्रतियोगितामा मदन भण्डारी स्पोर्ट्स एकेडेमीका विजय प्रजापति उत्कृष्ट ब्याट्सम्यान, सिईसी दयानन्द मण्डल उत्कृष्ट बलर घोषित हुँदै नगद ४ हजार तथा सिईसिका समिर बिष्ट म्यान अफ दी सिरिज घोषित हुँदै नगद ७ हजार रुपैया कपबाट पुरस्कृत भए । रुपन्देहीमा क्रिकेटमा योगदान दिएका क्रिकेट प्रशिक्षक जंग बहादुर थापालाई लाईभ टाईम एचिभमेन्ट अवार्डबाट सम्मान गरिएको थियो। थापाले २५ वर्ष देखि रुपन्देही ग्रासरुट क्षेत्रमा योगदान दिदै आएका छन् ।

एक समारोहका बिच प्रदेश खेलकुद परिषद लुम्बिनीका सदस्य जयप्रकाश भट्टराई, लुम्बिनी प्रदेश क्रिकेट संघका अध्यक्ष सन्जय गुरुङ, रुपन्देही क्रिकेट संघका अध्यक्ष हरि बहादुर थापा, तिलोत्तमा नगरपालिका वडा नं १७ का वडाअध्यक्ष दान बहादुर चौधरी, खेलकुद पत्रकार मंच रुपन्देहीका अध्यक्ष सुमन अधिकारी, पुर्व राष्ट्रिय क्रिकेट खेलाडी राजु खड्का, क्यानका पुर्व सचिव प्रशान्त बिक्रम मल्ल, पुर्व क्रिकेट खेलाडी अन्तिम थापा, पुर्व खेलाडि तथा प्रशिक्षक शक्ति गौचन, स्टार क्रिकेट एकेडेमीका निर्देशक कविता गौचनले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरे ।

कार्यक्रममा प्रदेश खेलकुद परिषद लुम्बिनीका सदस्य जयप्रकाश भट्टराईले खेल संस्कार सिकाउने प्रतिकका रुपमा रहेको बताए ।
कार्यक्रममा पुर्व खेलाडी तथा प्रशिक्षक शक्ति गौचनले छैटौ संस्करण थप उपलब्धिमूलक बनेको दाबी गरे । युवा खेलाडीहरुलाई प्लेटफर्म दिने लक्ष्यमा सफलता हासिल मिलेको उनले बताए ।

तिलोत्तमा नगरपालिकास्थित एक्स्ट्रा टेक ओभल क्रिकेट मैदानमा भएको खेलमा टस जितेर धनगढीले ३२.५ ओभरमा १ सय ५० रनको लक्ष्य दिएको थियो । धनगढी अशोक धामि ५० सुभाष सिह २५ रनको योगदान दिए । सिईसी दयानन्द मण्डल ३, करण घर्ती मगर र स्मिथ बुढा २–२ विकेट लिए । सिईसी ३५ ओभरमा १३८ रनमा समेटियो । सिईसीमा सुरेश बुढालले ४१ रन, स्मिथ बुढाले ४० रनको योगदान दिए । डिसिएका निशान रेग्मीले ४ तथा सुर्य श्रेष्ठले २ विकेट लिए । खेलमा धनगढीका निशान्त रेग्मी म्यान अफ दी म्याचका पुरस्कृत भए ।