खोज

सुर्खेत, १३ फागुन ।

वीरेन्द्रनगरमा गएराति गोली चलाएको भन्दै प्रहरीले चार जनालाई नियन्त्रणमा लिएको छ । वीरेन्द्रनगर नगरपालिका – १ को गौरीटोलमा राति ९ बजेतिर गोली चलेको थियो । वीरेन्द्रनगर वडा नम्वर एकका स्थानीय विनोद गिरीको गाडीलाई लक्षित गरी गोली हानिएको हुन सक्ने प्रहरीको अनुमान छ । गिरी चढेको गाडीमा गोली लागेको प्रहरीले जनाएको छ ।

जिल्ला प्रहरी कार्यालय सुर्खेतका प्रवक्ता डीएसपी लक्ष्मण शाहीका अनुसार विनोद चढ्दै आएको गाडी र मोटरसाइकलमा क्षति पुगेको छ । घटनामा संलग्न भएको आरोपमा चार जना पक्राउ परेको भएपनि उनीहरूको परिचय प्रहरीले सार्वजनिक गरेको छैन । अनुसन्धानमा समस्या आउन सक्ने भन्दै उनीहरुको परिचय भने गोप्य राखिएको छ ।

गिरी नेपाली कांग्रेस निकट तरुण दलको जिल्ला सदस्य समेत हुन् । फागुन १३ गतेदेखि वीरेन्द्रनगरका सञ्चालन हुने कर्णाली एक्सपोको विषयमा रहेर विवाद सिर्जना भएको थियो । सुर्खेत उद्योग वाणिज्य संघको आयोजनामा हुन लागेको उक्त महोत्सवको ठेक्काको विषयलाई लिएर दुर्ई समुहबिच विवाद भएको देखिन्छ । प्रहरीले घटनास्थलबाट कटुवा पेस्तोल, गोलीको खोका र एउटा मोटरसाइकल पनि नियन्त्रणमा लिएको छ । घटनाको विषयमा थप अनुसन्धान हुँदै गरेको डिएसपी शाहीले जानकारी दिए ।