खोज

बुटवल, २५ माघ । दर्शकलाई सुरपरहिट फिल्म चखाउन माहिर निर्देशक मिलन चाम्सले नेपालको सामरिक ईतिहासलाई उजगार गर्ने कथा बोकेको ‘गोर्खा वारियर’ फिल्म लिएर आएका छन । देश दौडाहमा लागेका उनि विहिबार बुटवलमा पत्रकारसंग भेटघाट गर्दै ‘गोर्खा वारियर’ आफ्नो ड्रिम प्रोजेक्ट भएको बताए । करीब साढे ३ वर्ष लामो सुटिङ समय लागेको फिल्म फागुन ११ गतेबाट दर्शकसमक्ष ल्याउन लागेको उनले बताए । उनको फिल्ममा मुख्य नायकमा नयाँ अनुहार रितेश चाम्सले डेब्यु गरेका छन् । बेलायत निवासी उनी पेशाले ‘पाइलट’ हुन् ।
फिल्ममा नायकको चरित्रसंग मेल खाने हुदा रितेशलाई लिएको उनको तर्क छ । ‘रितेश चाम्सले आफनो भुमिकामा न्याय गरेका छन ।‘– उनले भने । वार जनरा फिल्ममा एउटा सैनिकको भूमिका एउटा ‘मुभमेन्ट’ ले थाहा हुन्छ । बन्दुक बोक्ने शैलीले नै ऊ सैनिक हो या हैन भन्ने बुझिन्छ । त्यसका लागि ‘ट्रेनिङ’ प्राप्त हुनुपर्छ ।’ सैनिकको भूमिकाका लागि उनले गरेका तालिम फलदायी भएको उनले दाबी गरे । उनलाई ब्लक बस्टर निर्देशकका रुपमा लिईन्छ । पर्दामा बिक्ने राजेश हमाल, दयाहाङ राई, प्रदीप खड्का, पल शाह, प्रियंका कार्की जस्ता कलाकारलाई उनले निर्देशन गरिसकेका छन् ।

कार्यक्रममा नायक चाम्सले देशको कथा बोल्ने फिल्ममा आफु खेल्न पाउदा निक्कै गर्विलो महसुस भएको बताउछन । २ सय ९ वर्षअघिको नेपालको परिवेश र विश्व युद्धलाई ३ पुस्ता अघिका बाजे पालामा भएको घटनाक्रमलाई पर्दामा देखाउनु सामान्य नभएको भन्दै उनले धेरै मेहनत पछि फिल्म तयार भएको बताए । सिन्धुलीमा सुटिङको क्रममा सेनाबाट धेरै जानकारी पाउन सफल भएको उनले बताए । नेपाललाई स्वतन्त्र देशको रुपमा पहिचान बनाउन त्यसबेलाको गोर्खा बहादुरी र पुर्खाको योगदान रहेको उनले बताए । ‘विदेश जानेहरुको कथा पनि हो ।’–उनले भने ।

फिल्मका नायिका रेविका गुरुङले यो फिल्म गोर्खा सैनिकको बहादुरीलाई देखाउने गरि तयार भएको फिल्म भएको बताईन । केवल फिल्ममा लडाई, गोर्खा सैनिकको बहादुरीमात्र नभई उनिहरुको परिवारको कथा, त्यो बेलाको सोलुखुम्बु, त्यो बेलाको जिवनशैली, ईतिहासलाई फिल्ममा देखाउन खोजिएको बताईन । फिल्म सफल बनाउन सबैको हात सहयोग जरुरी रहेको उनले बताईन ।

हाल प्रमोशनका लागि देश दौडाहामा रहेको फिल्ममा रितेशका साथै विजय लामा, शिशिर वाङ्देल, रेविका गुरुङ, रियर राई, सारा राई, कविता आले, सुरज तमु, विरुप गोले, सरोज खालिङ, सुमिन गुरुङ, त्रिचु राई आदिको पनि अभिनय रहेको छ । सन् १९४९ मा ‘मलाया इमरजेन्सी जंगल वार’मा गोर्खा सैनिकले देखाएको बहादुरीको कथामा फिल्म आधारित छ । गत हप्ता सार्वजनिक गरिएको ट्रेलरपछि फिल्मको चर्चा चुलिँदो छ । मोफसल दौडाहामा फिल्म ‘गोर्खा वारियर’ चितवन, हेटौडा, पोखरा, बुटवल लगायतका शहरका दर्शक भेट्ने र काठमाण्डौ फर्किने योजना रहेको बताइएको छ ।