खोज

पाल्पा, २४ कात्तिक ।

तिहारलाई लक्षित गरेर परम्परागत कला संस्कृति तथा खानपानको जगेर्ना गर्ने उद्देश्यले तानसेनको टक्सारटोलमा दुई दिने रोटी महोत्सव सुरु भएको छ । पाल्पा उद्योग वाणिज्य संघ, तानसेन नगरपालिका, वडा नंं. ३ को कार्यालय र मैत्री क्लव तानसेनको आयोजनामा सुरु भएको रोटी महोत्सवमा स्थानीयस्तरमा उत्पादित रोटीहरु फिनी, लाखा, जुम्ली, अनरसा अर्सा, झिनिया, सेल, झर, पाते, लहरा तथा खुर्मा जस्ता विभिन्न रोटीका प्रकारहरु राखिएका छन् ।

तानसेनको बजारलाई चहलपहल बनाउन, स्थानीय उत्पादनको बिक्री वितरण बढाउन, स्थानीय स्तरमा रोजगारी बढाउन महोत्सवले सहयोग पुग्ने लुम्विनी प्रदेशका सभासद एवं पुर्व उर्जामन्त्री विर बहादुर रानाले बताए । महोत्सव शुभारम्भमा नेकपा एमाले पाल्पाका अध्यक्ष धनेन्द्रराज घिमिरे, पाल्पा उद्योग वाणिज्य संघका अध्यक्ष शैलेन्द भट्टराई, तानसेन नगरपालिकाका कार्यवाहक प्रमुख सागरमान महर्जन, वडा नंं. ३ का वडा अध्यक्ष बाबुरत्न शाक्य, मैत्री क्लव तानसेनकी अध्यक्ष मनिता शाक्य, पत्रकार महासंघका उपाध्यक्ष भरत शर्मा लगायतले यस्ता महोत्सवले परम्परागत कला संस्कृतीको नयाँ पुस्तालाई जानकारी गराउने र स्थानीय स्तरमा रोजगारी बढाउने बताए ।

महोत्सवमा आउने पाहुनाहरुलाई अन्य स्थानमा भन्दा सस्तो र गुणस्तरीय रोटीहरु उपलब्ध गराउने महोत्सव संयोजक रञ्जना थापा अर्यालले बताईन् । महोत्सवमा विभिन्न प्रकारका रोटीहरुको १५ वटा स्टलहरु राखिएका छन् । महोत्सवमा छमछमी कला केन्द्रले विभिन्न सांगेतिक कार्यक्रम प्रस्तुत गरेको थियो । रोटी महोत्सव शनिवार सम्म चल्ने छ ।