खोज

तिलोत्तमा, ८ जेठ ।

अखिल नेपाल किसान महासंघ तिलोत्तमा नगर कमिटीले तिलोत्तमा नगरपालिकामा ज्ञापनपत्र बुझाएको छ । सोमबार नगरपालिकाका प्रमुख प्रशासकीय अधिकृत नारायण अर्याल समक्ष सो ज्ञापन पत्र बुझाइएको हो । नगर कमिटी अध्यक्ष टेक प्रसाद अर्यालको संयोजकत्वमा सो ज्ञापनपत्र बुझाइएको सचिव हिमलाल बस्यालले बताए । ज्ञापनपत्र बुझ्दै प्रमुख प्रशासकीय अधिकृत अर्यालले ज्ञापनपत्रमा उल्लेख भएका विषयमा नगरले सक्दो पहल गर्ने प्रतिवद्धता व्यक्त गरे ।

ज्ञापनपत्रमा आर्थिक वर्ष २०८०÷८१ मा कृषिलाई पहिलो प्राथमिकतामा राखी २० प्रतिशत बजेट छुट्याउनु पर्ने, पशु चौपायाका नश्ल सुधार, उन्नत जातका बीउबिजन वितरण गर्नुपर्ने, पशु हाटबजारको व्यवस्था गर्नुपर्ने उल्लेख गरिएको छ ।

त्यसैगरी कृषि तथा पशुजन्य आन्तरिक उत्पादनको खपत गर्ने अनिवार्य जिम्मेवारी स्थानीय तहले लिनुपर्ने भन्ने माग गरिएको छ । साथै चोरी पैठारीको पूर्ण अन्त्य गर्नुपर्ने, जसका लागि निरन्तर किसान प्रतिनिधिको बजार अनुगमन हुनुपर्नेमा माग गरिएको छ । कृषि तथा पशुपंक्षीजन्य वस्तुको उत्पादन तथा उत्पादकत्व वृद्धि गर्न कृषि तथा पशुपंक्षी बजार, शीत भण्डार, बिउ भण्डार गृह, बीउ बैंक र कृषि पूर्वाधारहरूको निर्माण गर्नका लागि माग गरिएको छ ।

प्रंगारिक मल उत्पादन तथा उपयोगलाई प्रोत्साहन गरि बजेट विनियोजन गरिनुपर्ने , आर्थिक अनुदानलाई पारदर्शी रूपमा सञ्चालन गरिनुपर्ने , पशु आहारको गुणस्तर, मूल्य निर्धारण तथा पशु आहारमा व्यवस्था गर्न माग गरिएको लगायतका ३९ बुँदा सो ज्ञापन पत्रमा उल्लेख गरिएको छ । कार्यक्रममा अध्यक्ष टेकराज अर्यालको संयोजकत्वमा सचिव हिमलाल बस्याल, महासंघ प्रदेश कमिटी सदस्य पुष्करनाथ पन्थ, नगर सदस्यहरू गिरीराज पन्थ, शोभा पाण्डे, राधा अधिकारी, कला न्यौपाने, रामप्रसाद सापकोटा, भगवती भुसाल, पदमा लम्साल, हुमा पाण्डे माधव पाण्डे लगायत किसानको उपस्थिति रहेको थियो ।