खोज

बुटवल, १६ चैत ।

युवा खेलाडीहरुलाई प्रोत्साहन गर्ने उद्देश्यका साथ बुटवलमा सम्पन्न प्रथम उपमेयर कप टि–ट्वान्टी वडास्तरीय क्रिकेट प्रतियोगिताको उपाधि वडा नं. ३ ले चुमेको छ । बुधबार भएको फाईनल खेलमा वडा नं. ११ लाई १० रनले पराजित गर्दै वडा नं .३ विजयी भएको हो । उपाधिसंगै वडा नं. ३ नगद ३० हजार रुपैयाँ, कप, मेडल, प्रमाणपत्रबाट पुरस्कृत भयो । उपविजेता वडा नं. ११ भने नगद १५ हजार रुपैयाँ, कप, मेडल, प्रमाणपत्रमा चित्त बुझायो । प्रतियोगितामा म्यान अफ द सिरिज सन्दिप सुनार घोषित हुँदै नगद ४ हजार रुपैयाँ, कपबाट पुरस्कृत भए । यसैगरी वडा नं. ११ का जगत क्षेत्री उत्कृष्ट ब्याट्सम्यान, वडा नं. ३ का पदम मुखिया उत्कृष्ट बलर, उदयमान खेलाडी सन्दिप खत्री घोषित हँुदै पुरस्कृत भए ।

बुटवल उपमहानगरपालिकाका आर्थिक सहयोग र जितगढी रोयल क्रिकेट क्लबको आयोजनामा नरेश्वर क्रिकेट खेलमैदानमा भएको खेलमा टस जितेर वडा नं. ३ ले ब्याटिङको निर्णय गर्दै निर्धारित २० ओभरमा ७ बिकेटको नोक्सानीमा १ सय ४२ रनको लक्ष्य खडा गरेको थियो । उसका लागि पदम मुखियाले ४५ बलमा शानदार ८२ तथा गौतम मगर १६ रनको योगदान दिए । वडा नं. ११ का सन्तोष परियारले २ तथा प्रदिपले १ बिकेट लिए । मध्यम लक्ष्य पछ्याएको वडा नं. ११ निर्धारित २० ओभरमा ९ बिकेटको नोक्सानीमा केवल १ सय ३२ रनमा समेटियो । उसका लागि जगत क्षेत्रीले ५६ बलमा ८२ तथा सजनले १७ रनको योगदान दिएपनि जितका लागि प्रयाप्त भएन । कम स्कोरमा रोक्न वडा नं. ३ का पदम मुखिया र सगुन ले समान २–२ बिकेट लिए । खेलमा वडा नं ३ का पदम मुखिया म्यान अफ दी म्याचबाट पुरस्कृत भए ।

चैत ८ गतेबाट शुरु भएको प्रतियोगितामा बुटवल उपमहानगरपालिकाका विभिन्न वडाका १६ टिमले उपाधिका लागि प्रतिस्पर्धा गरेको क्लबका अध्यक्ष गंगाराम सुनारले बताए ।
एक कार्यक्रमका बीच बुटवल उपमहानगरपालिकाका उपप्रमुख सावित्रादेवी अर्याल, वडा नं. ३ का वडाअध्यक्ष विष्णु ढकाल, रुपन्देही क्रिकेट संघका सल्लाहकार केहरसिह भण्डारी, पुर्व खेलाडीहरु पुनित पोखरेल, गोकुल चापागाईले विजेता, उपविजेता टिम तथा उत्कृष्ट खेलाडीहरुलाई पुरस्कार बितरण गरेका छन् ।