बुटवल(बुटवल टुडे) चैत ।
महिला लघुवित्त वित्तीय संस्था लिमिटेड केन्द्रीय कार्यालय साँगा काभ्रेको आयोजनामा चालु आर्थिक बर्ष २०७९÷८०को समिक्षा तथा शाखा व्यवस्थापन तालिम प्रदान गरिएको छ । महिला अधिकार तथा विकास केन्द्रको आयोजानमा बुटवलमा २ दिने तालिम तथा अभिमुखिकरण कार्यक्रम गरिएको हो ।
कार्यक्रममा बोल्दै महिला अधिकार तथा विकास केन्द्रकी अध्यक्ष तुल्सी थापाले संस्थामा आवद्ध महिला दिदीबहिनीलाई वित्तीय कारोबारमा विशेष ध्यान दिन आग्रह गरिन् । उनले लघुवित्तबाट लिईसकेको कर्जा सदस्यले तिर्दैन भन्न नपाईने कानूनी व्यवस्था रहेको बताईन । उनले पछिल्लो समयमा लघुवित्त वित्तीय संस्थाको अवस्थाबारे विभिन्न भ्रम पैदा भएको भएपनि वास्तवमा यस्तो अवस्था नभएको बताईन । संस्थाले लघुवित्तबाट कर्जा लिएका महिलाहरुलाई स्वरोजगार बनाउनको लागि समय समयमा तालिम समेत प्रदान गर्ने उनको भनाई रहेको थियो ।
लघुवित्तका प्रमुख कार्यकारी अधिकृत कृष्ण प्रसाद न्यौपानेले कार्यक्रममा बोल्दै महिला लघुवित्तमा सहभागी महिलाहरुलाई एकिकृतगरी अहिलेको विद्यमान आर्थिक मन्दीलाई मध्यनजर गरेर काम गर्न सहभागीलाई आग्रह गरेका थिए । लघुवित्त वित्तीय संस्थाले स–सानो पुँजीबाट आर्थिक उपार्जनको बाटोमा उदाहरणीय काम गरेको भन्दै सहभागी लघुवित्तमा आवद्ध कर्मचारीलाई आर्थिक उपार्जनको बाटोमा नमुना बन्न आग्रह समेत गरेका थिए ।
दुई दिन सम्म चलेको तालिममा सहायक कार्यकारी अधिकृत हरि प्रसाद गौतम र कर्जा अशुली तथा जोखिम व्यवस्थापन विभाग प्रमुख ईश्वर बहादुर रोका, आन्तरिक लेखा परिक्षण विभाग प्रमुख बलबहादुर राना, अनुगमन विभाग प्रमुुख बुद्धिसागर न्यौपाने र केन्द्रीय कार्यालयका विभिन्न विभाग प्रमुख हरुको सहभागीता रहेको थियो । जसको मुख्यप्रशिक्षकको भुमिका राजु नेपालले निर्वाह गरेका थिए ।
हाल ७० वटा शाखा र ८ वटा सुपरिवेक्षण कार्यालय रहेको महिला लघुवित्तमा ७५ हजार महिला सदस्य आवद्ध रहेको सुपरिवेक्षण तथा निरिक्षण कार्यालय धनगढीका कार्यालय प्रमुख नारद न्यौपानेले जानकारी दिए । कार्यक्रममा ४ वटा सुपरिवेक्षण तथा निरिक्षण कार्यालयको सहभागीता रहेको योजना अनुसन्धान विभाग प्रमुख नारायण रोका ले बताए ।
