रोहित पौडेल
क्याप्टेन, राष्ट्यि क्रिकेट टिम, नेपाल
नेपालको क्रिकेट इतिहासमा सबैभन्दा सानो उमेरमा राष्ट्रिय टोलीको नेतृत्व गर्दै रेकर्ड कायम राखेका कप्तान हुन रोहित कुमार पौडेल । २० वर्षको उमेरमै राष्ट्रिय टोलीको नेतृत्व लिएका उनी हालसम्मका सर्वाधिक सफल कप्तान समेत हुन । आफ्नो नेतृत्वमा नेपालले खेलेको १९ वटा अन्तराष्ट्रिय एक दिवसिय खेलमा १३ जित निकालेका छन भने एउटा खेल नतिजा विहिन भएको थियो । भर्खरै सम्पन्न पि एन जि, यु ए इ र नेपाल सम्मिलित लिग २ क्रिकेट अन्तर्गत १२ खेलमा ११ जित निकाल्दै नेपालले सफलता प्राप्त गरेको थियो । विश्वकप क्वालिफायरमा छनौट भएसँगै नेपाली क्रिकेटको चर्चा विश्वभर भइरहेको छ । उनै सफल कप्तान रोहित कुमार पौडेलसँग बुटवल टुडेकर्मी प्रमोद अर्यालले गरेको कुराकानीको सम्पादित अंश ।
लिग २ क्रिकेटमा लगातारको जित हासिल गर्दै नेपाली क्रिकेटलाई एउटा उँचाइमा पु¥याउनु भएको छ । कस्तो अनुभूती भइरहेको छ ?
लिग प्रतियोगिताको अन्तिम चरणको खेल सुरु भइरहँदा र विगतका नतिजालाई हेर्दा एकदिवसिय मान्यता जोगाउन र क्वालिफायर मा पुग्न अंकतालिकाको आधारमा निकै परिश्रम गर्नुपर्ने अवस्था थियो । ओडिआइ मान्यता जोगाउन र क्वालिफायर्स खेल्न नेपालको सम्भावना करिव सुन्य जस्तै नै थियो तर एकपछि अर्को जित हासिल गर्दै गएपछि खेलाडीहरुमा मनोवल उच्च हुँदै गयो, प्रशिक्षकको रणनिति, समर्थकबाट पाएको हौसला र खेलाडीको मेहनतले हामीले दुबै अवस्थाको लागि सकारात्मक नतिजा प्राप्त गर्न सक्यौैँ, देश अन्तराष्ट्रिय क्रिकेटको सबैभन्दा ठूलो प्रतियोगिता तर्फ अघि बढदै गर्दा धेरै खुसी छौँ । अव थप जिम्मेवारी छ, देशलाई विश्वकपमा पु¥याउने, त्यसैको लागि तयारी सुरु हुँदैछ ।
नेपाल विश्वकप प्रतियोगिता खेल्नबाट अव एक कदम मात्र पछि छ, तयारी कसरी भइरहेको छ ?
हामी विश्वकप क्वालिफायर्समा छनौट भइसकेपछि अव सोहि प्रतियोगिताको तयारीमा जुटनु छ । लामो समय लिग प्रतियोगिताको लागि ब्यस्त भयौँ र नतिजा पनि आइसकेको छ । अहिले केहि दिनको लागि खेलाडीहरु पारिवारिक भेटघाट र केहि रिफ्रेसको लागि क्याम्प बाहिर छौँ अव लगत्तै हामी क्लोज क्याम्पमा प्रशिक्षणमा जुटछौँ । नियमित प्रशिक्षण, खेलको रणनितिसँगै तयारीमा जुटने छौँ । हामीलाई विगतको प्रतियोगितामा पाएको सफलताले हौसला बढेको छ, आशा छ हामी विश्वकपमा पुग्नेछौँ ।
विश्वकप क्वालिफायरमा नेपालले तुलनात्मक बलिया राष्ट्रहरुसँग प्रतिष्पर्धा गर्दै छ, नेपाल विश्वकपमा छनौट हुने आधारहरु के के देख्नुभएको छ?
प्रमुख आधार भनेको पछिल्लो समय प्राप्त नतिजा नै हो । हामी पछिल्लो खेलहरुमा ब्याटिङ्ग, बलिङ्ग दुबै सफलता पाएका छौँ । अर्को आधार युवा खेलाडीहरु फर्ममा हुनु र नियमित सफलता र अभ्यासले गर्दा खेलाडीहरुमा पनि निकै आत्मविश्वास जागेको छ । भर्खरै सम्पन्न लिगमा एक सय भन्दा कम रनमा विपक्षिलाई रोकेर बलिङ्ग बलियो भएको प्रमाणित गरेका छौँ भने २ सय ७०÷८० बढिको रन चेज गरेर ब्याटिङ्ग क्षमता समेत देखाएका छौँ । फिल्डिङ्गमा पनि सुधार छ, यिनै कारणले गर्दा पनि हामी विश्वकपमा पुग्छौँ भन्नेमा विश्वस्त छौँ ।
नेपाली टोलीको बलियो पक्ष र कमजोर पक्ष के के छन ? कसरी ब्यवस्थापन गर्नु भएको छ ?
पछिल्लो समय हाम्रो टिम तिन वटै पक्षमा बलियो देखिएको छ, जुन भर्खरै सम्पन्न लिगले प्रमाणित गरेको छ । विपक्षिलाई दुइ अंकको स्कोरमा समेटनु, ५ भन्दा माथी रनरेट आवश्यक हुँदा चेज गर्नुले टिम बलियो छ तथापी टेष्ट प्लेइङ्ग नेशनसँग खेल्नु पक्कै पनि चुनौतीपूर्ण हुन्छ । चुनौतीको सामना गर्न कोच र कप्तानले रणनिती बनाउने गर्दछन सोहि रणनिती अनुसार हामी अघि बढनेछौँ । पछिल्लो समय सुरुवाती ब्याटर नचल्दा मध्यक्रम, मध्यक्रम पनि धरमराउँदा पुछारका ब्याटरहरुले खेल जिताएका छन, ब्याटर नचल्दा बलर चलेका छन यसले पनि टिम सन्तुलित छ भन्न सकिन्छ ।
क्रिकेटको विकासको लागि सरकार र सरोकारवालाको कस्तो सहयोग छ ? के गर्नुपर्छ ?
नेपाली क्रिकेटमा सबैभन्दा ठूलो समस्या भनेकै भौतिक पूर्वाधार हो । यति ठूला ठूला प्रतियोगिता आयोजना भइरहेका छन स्तरिय रगशाला छैन । सबैभन्दा पहिले भौतिक पूर्वाधार हुनुपर्छ साथसाथै खेलाडीहरु पनि खेलेर जिवन धानिन्छ भन्ने अवस्था छैन । सरकार÷क्यानले आफ्नो तर्फबाट खेलाडीहरुलाई केहि पारिश्रमिक त दिएको छ तर अन्य देशको खेलाडिको तुलनामा अत्यन्तै न्युन छ । खेलेर पनि जिविकोपार्जन गर्न सकिन्छ भन्ने अवस्था छैन ।
नेपालमा क्रिकेटको क्रेज निकै बढेको छ, युएइ विरुद्धको खेल हेर्न हाम्रा शुभचिन्तक समर्थक रुखको टुप्पोसम्म पुग्नुभयो र हामीलाइ हौसला दिइरहनु भयो यदि स्तरिय रगशाला भएको भए दर्शकलाई पनि सुविधा हुनेथियो र ज्यानै जोखिममा राख्नुपर्ने अवस्था आउने थिएन । आगामी दिनमा पूर्वाधार निर्माणमा कदम चालियोस र खेलाडीलाई पनि आर्थिक रुपमा सवल बनाउनेतर्फ ध्यान पुगोस भन्न चाहन्छु ।
अन्त्यमा…..क्रिकेटलाई माया गरिदिनुहोस् । सरकार, क्यान र खेलकुदसँग सरोकार राख्ने सबैले माया गर्नुभयो भने नेपाली क्रिकेट अझै उचाईमा पुग्न सक्छ, विशेष धन्यवाद आम क्रिकेट प्रेमीहरुलाई दिन चाहान्छु, हामी विश्वकप यात्रामा छौँ यति सफलता दिलाउन हाम्रा शुभचिन्तक, खेलाडी साथी, लगायत सबैको उत्तिकै योगदान छ । अवको लक्ष्य विश्वकप हो, विश्वकप यात्राको लागि सबैले आफ्नो आफ्नो ठाँउबाट योगदान गरौँ भन्न चाहन्छु ।
ण्ण्
