खोज

बुटवल,९ चैत । बुटवलमा जारी २२औं तिलोत्तमा गोल्डकपमा फ्रेन्ड्स क्लवलाई पन्छाउँदै मनाङ मर्स्याङदी क्लव फाइनलमा पुगेको छ । यससँगै मनाङले शनिबार सुदूरपश्चिम ११ सँग उपाधि भिडन्त गर्ने भएको छ ।

बिहीबार भएको अन्तिम सेमिफाइनल निर्धारित समयमा २–२ गोलको बराबरी भएपछि पेनाल्टीबाट हार जित टुंगो लागेको हो । जसमा मनाङ ४–३ गोलले विजयी भयो । फ्रेन्डस क्लबका असिम भुसाल र डोना थापाले बललाई जाली चुमाउन नसक्दा मनाङको जित सुनिश्चित भएको हो । असिमको प्रहार गोलपोस्टको माथिल्लो भागमा ठोक्किएर बाहिरिएको थियो भने डोनाको प्रहारलाई बिपक्षी किपरले फर्काएर असफल बनाइदिए ।

खेलमा सुरुवाती अग्रता भने फ्रेन्ड्स क्लबले लिएको थियो । पहिलो हाफको ७औं मिनेटमा फ्रेन्ड्सका रफिक अमिनोले गोल गरेका थिए । खेलको २६औं मिनेटमा लक्ष्मण रुचालको क्रसमा उत्तम राईले गोल गर्दै टीमलाई २–० को अग्रता दिलाए ।

तर, पहिलो हाफको इन्जुरी समयमा मनाङका आशिष गुरुङले गोल गर्दै टीमलाई २–१ को स्थितिमा ल्याए । पहिलो हाफसम्म २–१ मा टुंगिएको खेलमा दोस्रो हाफको २ मिनेटमै मनाङका प्रसन्न श्रेष्ठले बराबरी गोल गरे । त्यसपछि दुवै टीमबाट गोल हुन सकेन र नजिता पेनाल्टीबाट लिइएको थियो ।
खेलमा मनाङका क्याप्टेन आशिष गुरुङ म्यान अफ द म्याच भए ।

दुई विभागीयसहित ८ टीम सहभागी प्रतियोगिताको विजेताले ११ लाख ११ हजार १११ रुपैयाँ नगद पुरस्कार पाउने आयोजक रुपन्देही जिल्ला फुटबल संघले जनाएको छ ।

गोल्डकपको उपविजेताले ५ लाख ५५ हजार ५५५ रुपैयाँ पुरस्कार पाउनेछ । सर्वोत्कृष्ट खेलाडीले एक लाख रुपैयाँ वा एक थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिडफिल्डर, डिफेन्स र कोचले जनही ३० हजार रुपैयाँ नगद पुरस्कार पाउनेछन् ।