खोज

बुटवल,२३ माघ ।    भारतीय हिन्दु धर्मगुरु मोरारी बापु द्वारा माघ २४ देखि हुने राम कथा प्रवचन कार्यक्रम बुद्ध जन्मस्थल लुम्बिनी पसिर बाहिर गर्न विभिन्न ६ वटा बौद्ध धर्मावलम्बी संघसंस्थाले माग गरेका छन् । लुम्बिनी गुरुयोजना क्षेत्र भित्र गैर बौद्ध धार्मिक कार्यक्रम गर्न नहुने माग गर्दै बौद्वमार्गी संयुक्त संघर्ष समितिले सोमबार दिनभर लुम्बिनीको पर्साचोकमा शान्तिपूर्ण विरोध प्रदर्शन गरेको थियो । उक्त प्रदर्शनको विरोधमा केही स्थानीय सडकमा उत्रेपछि दिनभरजसो लुम्बिनीमा तनाव भएको छ । प्रशासनले ठूलो संख्यामा प्रहरी परिचालन गरेर अप्रिय घटना हुन दिएन ।

लुम्बिनीमा राम कथा प्रवचन कार्यक्रम हुनु ठिक हो र हुनुहुदैन भन्ने दुई पक्षबीच बिवाद भएपछि तनाव उत्पन्न भएको हो । बौद्वमार्गी संयुक्त संघर्ष समितिले गरेको कोणसभामा दलबहादुर विरकट्टामगर रामचन्द्र थारु,रामचन्द्र कोइरी,झमबहादुर गुरुङ,शंकर गाहा,गंगा राना लगायतले बोल्दै आफूहरुले हिन्दु धर्म र मोरारे बापुको विरोध नगरेको तर बौद्ध मार्गीको आस्थाको केन्द्रमा गैर वौद्ध कार्यक्रम गर्नु उचित नभएकाले अन्यत्र गर्न माग मात्र गरेको बताए ।

उनीहरुले आफूहरुको माग र शान्तिपूर्ण प्रदर्शनलाई गलत व्याख्या गरिएको भन्दै आपत्ति जनाए । उनीहरुले वौद्धमार्गीहरु सधैं सामाजिक सद्भाव र धार्मिक सहिष्णुताको पक्षमा रहेको स्पष्ट पारे ।

लुम्बिनी विकास कोषले धार्मिक र सामुदायिक सद्भाव कायम गर्न सबैलाई अपिल गरेको छ । लुम्बिनीस्थित अन्तर्राष्ट्रिय सम्मेलन तथा ध्यान केन्द्रमा प्रवचन हुने कार्यक्रमका लागि हल प्रयोग गर्न अनुमति दिइएको विषयलाई लिएर सरोकारवाला संघसंस्थाले चासो, चिन्ता र प्रश्नहरू उठाएर विज्ञप्ति, ध्यानाकर्षण र विरोध जनाएपछि कोषले सद्भाव कायम राख्न अपिल गरेको हो ।
रूपन्देहीका प्रहरी प्रमुख एसपी रवीन्द्र रेग्मीले लुम्बिनीमा व्यापक रूपमा प्रहरी परिचालन गरिएको र भोलिदेखि शुरु हुने कथावाचन नरोकिने स्पष्ट पारे । कथावाचनका लागि मोरारे बापु रुपन्देही आइसकेका छन् । उनलाई पुर्व गृहमन्त्री बालकृष्ण खांण लगायतले विमानस्थलमा स्वागत गरेका छन् ।