खोज

सल्यान, २० माघ ।

सल्यानको त्रीवेणी गाउँपालिकाले वडास्तरमा संचानल गरेको पशु स्वास्थ्य शिविरमा १२२ जना किसानले लाभ प्राप्त गरेका छन् । शुक्रबार वडा नम्बर २ को गैरागिठिमा आयोजना गरिएको शिविरमा पशुको उपचार, बन्ध्याकरण, औषधि वितरण संगै रेविज विरुद्धको खोप लगाइएको पशुपन्छी विकास शाखाले जनाएको छ ।

निःशुल्क पशु स्वास्थ्य शिविरमा एक हजार १९० बाख्रा, ९८१ कुखुरा, ११४ गाइगोरु र सातवटा भैंसीलाइ औषधि वितरण गरिएको गाउँपालिकाका पशु विकास शाखा प्रमुख वसन्त रावतले जानकारी दिए । उनका अनुसार १० वटा बोकाको बन्ध्याकरण गरिएको थियो भने नौ वटा कुकुरलाइ रेविज विरुद्धको खोप लगाइएको थियो ।

कार्यक्रममा गाउँपालिका उपाध्यक्ष सीता खड्का पुनले शिविरबाट पशुपालक किसानले आफ्नै गाउँठाउँमा सेवा पाएको भन्दै आगामी दिनमा पनि यस्ता कार्यक्रमलाइ निरन्तरता दिने बताइन । यस्तै वडा नम्बर २ का वडाध्यक्ष हस्त बहादुर रामजाले व्यवसायिक रुपमा पशुपालनमा लाग्नुपर्नेमा जोड दिए । पशु सेवा शाखाभन्दा टाढाका वस्तिमा गाउंपालिकाले यस प्रकारका कार्यक्रम संचालन गर्दै आएको छ । गाउँपालिकाले वडा नम्बर ५ मा पनि पशु स्वास्थ्य शिविर संचालनको तयारी गरेको छ ।