खोज

दाङ, १४ कात्तिक ।

दाङको घोराहीमा बिहीबारदेखि सुरु हुने १८ औं राष्ट्रिय ज्योतिष सम्मेलनको तयारी पूरा भएको छ । बुधबार दाङको घोराहीमा आयोजित पत्रकार सम्मेलनमा आयोजक नेपाल ज्योतिष परिषद्ले सम्मेलनको बारेमा जानकारी गराएको छ । उक्त सम्मेलनको सबै तयारी पुरा भएको र सम्मेलनको नेपाल सरकारका सञ्चार तथा सुचना प्रविधि मन्त्री रेखा शर्माले उद्घाटन गर्ने आयोजकले जनाएको छ ।

नेपालभित्र रहेका ज्योतिष वास्तु तथा कर्मकाण्ड क्षेत्रमा लागेकाहरुलाई संगठित गरी ज्योतिष वास्तु तथा कर्मकाण्ड पेसालाई मर्यादित र व्यवस्थित गराउनुका साथै जनमानसमा यी विधाहरूको प्रचारप्रसार गर्न र ज्योतिष विज्ञानको अध्ययन, अध्यापन, प्रशिक्षण, परामर्श तथा अनुसन्धान गरी राष्ट्रिय र अन्तर्राष्ट्रिय क्षेत्रमा छरिएर रहेका गणित ज्योतिष र फलित ज्योतिष विधामा रहेका मतमतान्तरहरुलाई मनन गरी वास्तविक तथ्यको निक्र्यौल गर्ने उद्देश्यले कार्यक्रमको आयोजना गरिएको आयोजकले जनाएको छ ।

ज्योतिषीय परामर्श जन्मदेखि मृत्युप्रयन्त सबैलाई आवश्यकता पर्ने भएकोले सर्वसाधारण सवैमा प्रारम्भिक ज्योतिषको ज्ञान दिलाउन प्रयास गर्ने, ज्योतिष विज्ञानको गरिमा र सत्यतालाई समाजमा जानकारी गराउने संस्थाको उद्देश्य अनुसार नै संस्थाको संगठन सुदृढीकरण र विस्तारका लागि २५ औं वार्षिक साधारणसभा तथा १८ औं राष्ट्रिय ज्योतिष, वास्तु तथा अध्यात्म सम्मेलन २०८० को आयोजना गरिएको छ ।

नेपाल ज्योतिष परिषद् लुम्बिनी प्रदेश समितिले विभिन्न सृजनात्मक कार्य गर्नुका साथै अत्याधुनिक सभाहल, विद्युतीय पुस्तकालय, वेधशाला, ग्रहवाटिका, ज्योतिष प्रवर्तकहरुको मुर्ति समेत स्थापना गरि सुविधासम्पन्न भवन निर्माण गर्ने प्रशंसनीय कार्य गरेकोले सो कार्यलाई प्रोत्साहन गर्न स्वर्गद्वारी महाप्रभुको क्रिडास्थल लुम्बिनी प्रदेशको सुन्दर नगरी घोराही दाङमा यो कार्यक्रम आयोजना गरिएको हो ।

सम्मेलनमा कार्यपत्र प्रस्तोता उपप्राध्यापक.कपिलदेव सुवेदी, वैदिक वास्तु विषयक ई. लक्ष्मीप्रसाद सोती वास्तुमा पञ्चतत्वको अवस्था र महत्व विषयक कार्यपत्र प्रस्तोता प्राडा अर्जुन प्रसाद भट्टराई, ज्योतिषमा विद्या र सन्तान विचार विषयक प्राध्यापक. प्रेमकुमार आचार्य संस्कारको महत्व र सोह्र संस्कारहरु विषयक कार्यपत्र प्रस्तुत हुनुका साथै नेपाल ज्योतिष परिषद् केन्द्रीय समितिको मुखपत्र ज्योतिष सन्देशसमेत लोकार्पण हुने आयोजकले जनाएको छ । विभिन्न विषयहरूलाई दुइदिने कार्यक्रममा समेटिने भएकाले सम्मेलन ऐतिहासिक हुने बताइएको छ ।