खोज

बुटवल, २५ भदौ ।

राष्ट्रिय बाल दिवस –२०८० को अवसरमा नेपाल बाल संगठन रुपन्देहीले जिल्लाव्यापी विद्यालयस्तरीय तीज गित प्रतियोगिता सम्पन्न गरेको छ । बालबालिकामा लगानी ः सुनिश्चित भविष्यको थालनी” भन्ने मूल नाराका साथ बुटवल बाल मन्दिरको सभाहलमा सम्पन्न भएको उक्त प्रतियोगितामा रुपन्देहीका ११ बिद्यालय सहभागी भएको नेपाल बाल संगठन रुपन्देहीका सभापति साजन भण्डारीले जानकारी दिए ।

प्रतियोगितामा एभरेस्ट बोर्डिङ स्कुल प्रथम, गाग्री एकेडेमी द्वितीय, न्यू होराईजन तृतीय भएको छ भने उक्त प्रतियोगितामा होराईजन गौतम बुद्ध एकेडेमी सान्त्वना भएको थियो । प्रतियोगितामा प्रथम, द्वितीय, तृतीय र सान्त्वना हुनेलाई क्रमशः १५ हजार, १० हजार, ७ हजार र ५ हजार सहित ट्रफी र प्रमाणपत्र वितरण गरिएको नेपाल बाल संगठनका कार्यसमिति सदस्य सुरज भट्टराईले जानकारी दिए । प्रतियोगितामा नारायण प्रसाद खनाल, अन्जु श्रेष्ठ र अनु रजकले निर्णायकको भूमिका निर्वाह गरेका थिए ।

यसअघि प्रतियोगिताको उदघाटन बुटवल उपमहानगरपालिकाकी उपप्रमुख सावित्रादेवी अर्यालले गरेकी थिइन् । त्यस अवसरमा उनले तीज पर्वको ऐतिहासिक, धार्मिक र सांस्कृतिक महत्वमाथि चर्चा गर्दै बदलिंदो परिवेशसँग तीज मनाउने प्रचलन पनि फेरिंदै गएको बताइन् ।

त्यस अवसरमा प्याब्सन लुम्बिनी प्रदेशका अध्यक्ष लालहरी पाण्डे, समाजसेवी अरुणा श्रेष्ठ, नमस्ते नेपाल बाल क्लबको उपाध्यक्ष एलिजा थारु, संगठनका उपाध्यक्ष अञ्जु श्रेष्ठ लगायतले शुभकामना व्यक्त गरेका थिए । प्रतियोगी टिमहरुको सहजीकरण संगठनको सचिव कल्पना पाँडे मगरले गरेकी थिइन् ।