खोज

सन्धिखर्क, १३ चैत ।

अर्घखाँचीको भूमिकास्थान नगरपालिका अर्घाखाँचीले सहकारीकर्मीलाई लेखा तथा व्यवस्थापकीय तालिम प्रदान गरेको छ । नगरपालिका भित्र रहेका ३१ जना सहकारीकर्मीहरुलाई ५ दिने क्षमता विकास सम्बन्धी तालिम प्रदान गरिएको हो ।

भूमिकास्थानको सहकारी तथा उद्योग शाखाको आयोजना र राष्ट्रिय सहकारी बैंक बुटवल शाखाको प्राविधिक सहयोगमा संचालन भएको तालिममा राष्ट्रिय सहकारी बैंक बुटवल शाखा प्रमुख नारायण बेल्वासेले प्रशिक्षण दिएको सहकारी शाखा प्रमुख शंकर अधिकारीले जानकारी दिए । कृषि र पर्यटनलाई व्यावसायिक बनाइ बजारीकरणको निम्ती सहकारीसंग साझेदारी गर्ने योजनाका संस्थागत रुपमा क्षमता विकास गर्नको लागि सहकारीकर्मीको लागि तालिम संचालन गरिएको अधिकारीले बताए ।

नगरपालिका भित्र रहेका ३१ वटा सहकारी संस्थाका प्रतिनिधिहरूको सहभागिता रहेको तालिममा मुख्य प्रशिक्षक बेल्वासेले लेखा व्यवस्थापन, भूमिकास्थानका योजना शाखा प्रमुख हरिशचन्द्र भुसालले संस्थागत व्यवस्थापन, कृषि शाखा प्रमुख राम बहादुर थापाले उत्पादनको क्षेत्रमा सहकारीको आवद्धता र सहकारी शाखा प्रमुख शंकर अधिकारीले कोपोमिस प्रणाली व्यवस्थापन सम्बन्धि प्रशिक्षण दिएका हुन् ।

सैद्धान्तिक संगै प्रयोगात्मक कक्षालाई समेत जोड दिइएको तालिमको समापन शत्रमा सहभागिले खुशी व्यक्त गर्दै तालिमबाट सिकेका सिपलाई आफुहरु आबद्ध सहकारीमा लागू गर्ने प्रतिवद्धता व्यक्त गरेका छन् । तालिम चैत्र ८ गते सुरु भइ चैत्र १२ गते समापन गरिएको भुमिकास्थान नगरपालिकाका कम्प्युटर अधिकृत शेषकान्त घिमिरे ओसनले जानकारी दिए ।