राजिव खनाल
प्रबन्ध निर्देशक, नेक्स्ट रिभोलुसन नेपाल
मिस बेष्ट्रन नेपालको शनिबार होटल फ्लामिङगोमा फिनालेको आवश्यक तयारी पूरा भएको छ । मिस नेपाल हिडन ट्रेजरको फ्रेन्चाईचीका रुपमा नेक्स्ट रिभोलुसन नेपालले पाचौ संस्करणको प्रतियोगिताको तयारी पुरा गरेको हो । अन्तर्राष्ट्रिय मान्यताअनुसार न्यूनतम ५ फिट ३ इन्च उचाई तथा १८ देखि २७ वर्षका अविवाहित ९ जना अन्तिम सहभागीहरु दुई हप्तासम्म योगा प्रशिक्षक निश्चल ईन्द्रायणी, राजिव खनाल, गोपाल अधिकारी, छबि शर्मा, समुन्द्र घिमिरे जिसिबाट तालिम लिएर फिनालेको चरणमा पुगेका छन । तिलोत्तमा नगरपालिकाका बिनिता भट्टराई, बुटवलका ममता घिमिरे, बुटवल निशा पाण्डे, सबिता बेलबासे, तिलोत्तमाका करुणा काफ्ले, सैनामैना अफसना सुनार, सैनामैना कृष्णा माहोत्रा, सिद्धार्थनगरकी मनिषा चौधरी, सैनामैनाकी अजिता रेग्मी अन्तिम ९ प्रतियोगी हुन ।
यसै विषयमा नेक्स्ट रिभोलुसन नेपालका प्रबन्ध निर्देशक राजिव खनालसंग बुटवल टुडेकर्मी स्वस्तिक श्रेष्ठले गरेको कुराकानी ।
मिस बेष्ट्रन नेपाल आयोजनाको मुख्य उद्येश्य के हो ?
सन २०१८ बाट यो क्षेत्रमा हामीले पहिलो प्रतियोगिता गरेका थियौ । पाचौ संस्करणमा आईपुग्दा हामीले धेरैलाई प्लेटफर्म दिन सफल भएका छौ । वास्तवमै महिला शसक्तिकरण कुरा गर्नेभन्दा पनि ब्यवहारमा उतार्न जरुरी छ । संस्थागत रुपमा हामीले पाचौ संस्करणसम्म आईपुग्दा धेरै युवाहरुलाई उनिहरुको लक्ष्य देखाउन सफल भएका छौ । मिस बेष्ट्रन नेपाल युवा उमेरमा समाज चिनाउने, उनिहरुको चाहना, भावना बुझ्ने बुझाउने र भविष्य उनिहरु के बन्न चाहन्छन त्यसबारे दिशानिर्देश गर्ने महत्वपूर्ण कार्यक्रम हो । लिगको आधारमा हुने विभेदलाई अन्त्य गर्न महिलाहरुको क्षमता विकासमा जोड दिनुपर्छ । अझ भन्नुपर्दा यो कार्यक्रम उनिहरुलाई बाहिरी सुन्दरतासंगै उनिहरुको लुकेको प्रतिभा र क्षमता प्रस्फुटन गराउने मंच हो ।
यसमा सहभागीहरुले के कस्ता क्षमता विकासमा सहभागी हुन्छन ?
सुन्दरी प्रतियोगिताको बारेमा कुनै बेला नकारात्मक टिकाटिप्पणी हुने गरेको थियो । समाज बदलिएको छ । आज यो युवाहरुलाई एउटा उपयोगी प्लटफर्मका रुपमा रहेको छ । महिलाको सुन्दरतालाई मात्र हेर्ने नभई बौद्धिकता समेत मापन गर्ने रुपमा यो प्रतियोगिता बनेको छ । सहभागीहरुलाई दक्ष प्रशिक्षकहरुबाट नेतृत्व विकास, समाजमा आफनो मनका कुरा पोख्न सक्ने आत्मविश्वास बढाउने तालिम, जिवनमा सकारात्मक परिवर्तन ल्याउन उपयोगी हुने क्षमता विकासका अवसरका साथै सुचना प्रविधिको उपयोग र दुरुपयोग रोक्ने विषयमा ज्ञान दिएका छौ । क्लोज क्याम्पमा योगा, नेतृत्व तालिम, बजारीकरण, फोटो र भिडियो सुट, युवा उद्यमी सम्बन्धि तालिम उनिहरुलाई दिईएको छ । समाज रहेका विसंगति, बेतिथिहरुका बिरुद्ध आवाज उठाउन सक्ने गरि हामीले उनिहरुलाई तयार गर्दछौ ।
उपाधि विजेताले के उपलब्धि प्राप्त गर्नेछन ?
यो प्रतियोगिताको फिनालेमा विजेता एक जनाले पश्चिम क्षेत्रबाट प्रतिनिधित्व गर्दै मिस नेपालमा भाग लिने छ । ब्यक्तिगत प्रतिस्प्रर्धामात्र नभई समुहगत विकास र समन्वय विकास गराउन र जीवन जिउन सिकाउन सफल भएका छौ । सन २०१८ बाट यो क्षेत्रमा वर्षेनी गरिएको प्रतियोगिताबाट दर्जनौ सहभागीहरुलाई विभिन्न क्षेत्रमा सफलता दिलाउन सफल भएका छौ । यस क्षेत्रबाट प्रतिनिधित्व गरेका सहभागीले मिस नेपालमा टप १२ सम्म पुगेका छन ।
