आषाढ ७ २०७८   |  2021 Jun 21    


८० प्रतिशत अनुदानमा तिनाउका किसानलाई पाडापाडी


news

तिनाउ गाउँपालिकाका किसानलाई अनुदानमा भैँसीको पाडापाडी वितरण गरिएको छ ।

विपन्न किसानलाई आयआर्जनमा टेवा पुगोस् भनेर पशुपालनमा सहयोग गरिएको हो ।

मुख्यमन्त्री ग्रामीण विकास तथा रोजगार कार्यक्रमअन्तर्गत उनीहरूलाई पाडापाडी वितरण गरिएको हो ।

२ नम्बर वडाको मिलिजुली टोलविकास संस्थाका २० जना किसानलाई पाडा वितरण गरिएको छ । झ्याङ्ला र बगाहाका ३२ जना किसानलाई पाडी वितरण गरिएको गाउँपालिकाका प्रवक्ता राजेश श्रेष्ठले बताए । उनका अनुसार वडा नम्बर ५ का किसानलाई पनि पाडापाडी वितरण गर्ने तयारीे छ ।

८० प्रतिशत अनुदानमा पाडा र पाडी वितरण गरिएको उनले बताए। पाडा र पाडीलाई सरदर १६ हजार रुपैयाँमा खरिद गरिएको छ। उनका अनुसार बोलपत्र आह्वान गरेर नवलपरासीबाट खरिद गरेर गाउँपालिकाले पाडापाडी ल्याएको हो।

गाउँपालिकाको हरियाली गाउँ, सुकेतालका किसानलाई बाख्रा वितरण गरिएको छ । खुर्साने, बडहरे, माराबासमा बंगुर वितरण गरिएको वडा नम्बर २ का वडाध्यक्ष श्रेष्ठले बताए । वडा नम्बर ५ को मरामकोट पाताल, बिस्कुनडाँडा, भोक्तेछाप र कोलडाँडाका किसानलाई पनि पाडापाडी, बाख्रा र बंगुर वितरण गर्ने कार्यक्रम रहेको छ ।

यहाँका किसानले राँगा पालेर मनग्य आम्दानी गरेका छन् । उन्नत जातको बाल राँगाबाट सिजनअनुसार दैनिक २ हजार कमाउँदै आएका छन् । मासुका लागि राँगा बिक्री गर्दै आएका किसानले पनि राम्रो आम्दानी गरेको श्रेष्ठले बताए।

यहाँका अधिकांश नागरिक पशुपालन गर्दै आएका छन्। परम्परागत रुपमा पशुपालन गर्दै आएका किसानलाई व्यावसायिक बनाउन यो कार्यक्रमले सहयोग पुग्ने गाउँपालिका अध्यक्ष ओमबहादुर घर्तिले बताए ।
उक्त गाउँपालिका वन जंगल क्षेत्र धेरै छ । पशुपालनको लागि यहाँ प्रशस्त घाँस र चरिचरण गर्ने ठाउँ रहेका उनले बताए । गाउँपालिकालाई मासु, दूध र तरकारीमा आत्मनिर्भर बनाउने गरी गाउँपालिकाले कार्यक्रम संचालन गरिरहेको घर्तीमगरले बताए ।

अपडेट : 2021-06-11 15:46:50




your-image

Leave a Comment