आषाढ ७ २०७८   |  2021 Jun 21    


कालिपोखरीमा पर्यापर्यटनको चर्चा


news

मसिना—कालिपोखरी क्षेत्रलाई पर्यटकीय क्षेत्रको रुपमा विकास गर्न कालिपोखरी सामुदायिक वन उपभोक्ता समूहले अभियानको थालनी गरेको छ । वन समूहले विश्व वातावरण दिवसको अवसरमा स्थलगत अवलोकन तथा अन्तरक्रिया कार्यक्रमको आयोजना गरेको थियो ।


स्थलगत अवलोकन पछि आयोजना गरिएको अन्तरक्रिया कार्यक्रममा वोल्ने वक्ताहरुले जिल्ला सदरमुकाम देखी निकै छोटो दुरीमा रहेर पनि सो स्थान ओझेलमा परेकामा चिन्ता व्यक्त गर्दै अव पर्यटकीय क्षेत्रको रुपमा विकास गर्नुपर्ने वताएका थिए । सामुदायिक वनमा पर्यापर्यटन वा नगर उद्यानको रुपमा सो क्षेत्रलाई विकास गर्न सकिने उनीहरुको भनाई थियो । रोल्पा नगरपालिका वडा नंं ४ मा पर्ने सो क्षेत्रसंग नगरपालिकाको वडा नं. १ र २ को वन क्षेत्र पनि जोडिएकाले ३ वटै वडाको एकीकृत प्रयासवाट सो क्षेत्रलाई पर्यटकीय क्षेत्रको रुपमा अगाडी वढाउन सकिने उनीहरुको सुझाव थियो ।


कालिपोखरी सामुदायिक वन उपभोक्ता समूहका अध्यक्ष कृष्णप्रसाद शर्माको अध्यक्षतामा भएको अन्तरक्रिया कार्यक्रममा पत्रकार महेश न्यौपाने, उपप्रध्यापक झक्कुप्रसाद न्यौपाने,महिला नेतृ सुधा न्यौपाने,शिक्षक जीतकुमार न्यौपाने, डिल्लीराज न्यौपाने,खिमप्रसाद शर्मा, ज्ञानेन्द्र शर्मा लगायतले धारणा राखेका थिए । अन्तरक्रिया कार्यक्रमको सहजीकरण व्रेकफास्ट न्यौपानेले गरेका थिए । कोरोनाका कारण सामाजिक दुरी कायम गरेर गरिएको उक्त कार्यक्रममा करिव २ दर्जनको सहभागिता रहेको आयोजकले जानकारी दिएका छन ।


सदरमुकाम लिवाङवाट ५ किलोमिटरको दुरीमा रहेको सो स्थानमा रहेको पोखरीमा कालिनागको वासस्थान रहेको रहने गरेको किमदन्ती छ । कालिनाग वस्ने पोखरी भएकाले सो स्थानलाई कालिपोखरी भनिएको धार्मिक विश्वास छ । सो स्थानमा अहिले पनि पोखरी देख्न सकिन्छ । सो पोखरीमा रहेको पानी वाजविसौना,कालिमाटी जस्ता खानेपानीको अभाव रहेका ठाउँहरुमा मुलको रुपमा रहेको जनविश्वास रहेको छ । सो स्थानवाट सूर्योदय र सूर्यास्थको दृश्यावलोकन गर्न सकिन्छ । दाङ,प्यूठान,वाग्लुङ,सल्यान,रुकुम लगायतका जिल्लाको सहजै दृश्यावलोकन गर्न सकिने सो स्थानवाट दक्षिण रोल्पाका प्रायःसवै वस्तीहरु पनि देख्न सकिन्छ । साविक राप्ती अंचलका तीन महत्वपूर्ण धार्मिक स्थलहरु स्वर्गद्धारी रुन्टी र जलजलाको समेत सहजै दृश्यावलोकन गर्न सकिन्छ । कालिपोखरीमा रहेका तीन वटा ठुलठुला चौरहरुमा चाईनिज दुवो जस्तो देखिने फरक खालको प्राकृतिक दुवोले त्यहाँको भूगोल समेत मनोमोहक देखिन्छ । कालिपोखरी देखी नजिकै रहेको कलसे धुरीमा भ्यूटावरको सामान्य संरचना वनाउन सके थप दृश्यावलोकन गर्न सकिने स्थानीयहरुको भनाई छ ।


सो क्षेत्रलाई पर्यटकीय क्षेत्रको रुपमा विकास गर्न एक समिति समेत गठन गरिएको छ । खिमप्रसाद शर्माको अध्यक्षतामा रहेको सो समितिमा सुधा न्यौपाने उपाध्यक्ष,ज्ञानेन्द्र शर्मा सचिव,व्रेकफास्ट न्यौपाने सहसचिव र सुचना घिमिरे कोषाध्यक्ष रहेका छन ।समितिको सदस्यहरुमा कृष्ण शर्मा,विष्णु शाही,विराट केसी र माईकल कवँर रहेका छन ।


समितिले रोल्पा नगरपालिका, ४ नम्वर वडा कार्यालय, छिमेकी वडा कार्यालय र डिभिजन वन कार्यालय संग समन्वय गरि पर्यटन विकासका थप संभावनाको खोजी गर्ने जिम्मेवारी रहेको सचिव ज्ञानेन्द्र शर्माले जानकारी दिए । कोरोनाको दोश्रो लहरको त्रास कम भएसंगै रोल्पा नगरपालिकाका नगरप्रमुख, डिभिजन वन कार्यालयका प्रमुख, पत्रकार र पर्यटनका जानकारहरुलाई स्थलगत अवलोकन गराउने कार्यतालिका वनाएका छौ सचिव शर्माले भने ।

अपडेट : 2021-06-08 17:36:03




your-image

Leave a Comment