आश्विन ९ २०७७   |  2020 Sep 25    


अहिले नै मेरो किरीया गर             


news

शरिर पक्षघातले थिचिएर

महिनौं भयो

चलमलाउन छाडेको

ढाड भरि घाउ नै घाउ भएर

ओछ्यान पिपमय भएको छ

दिसा पिसावको दहमा

नुहाउँदै म बाँचेको छु ।

 

साँच्चै ! म बाँचेको छु

वा मरेको छु ?

मुटुको ढुकढुकी

र दोहोरो सास फेराई

के यहि हो बाँच्नुको परिभाषा ?

शरिर त जड भै सक्यो

प्रतीक्षा छ

मुटुको ढुकढुकी

र सास रोकिनुको

अनि

सायद म मर्ने छु

त्यस पछि

गोहि अश्रु खसाउँदै

पुरा गर्ने छन् औपचारिकता

सन्तति हुनुको

वस्

पर्खाई छ त्यसैको ।

 

परलोकमा सुख चैन कटाउन

शुरु हुने छ काज किरीया

अनि

टिकाटालो र दान दक्षिणा

गरिने छ भरपुर

ऋणै खोजेर भएपनि

छापिने छन् श्रद्धाञ्जलि पत्रिकाहरुमा

वैरिने छन् समवेदना सन्देश

फेसबुकका भित्ताहरुमा

किनकि देखाउनु परेको छ

तामझाम समाजलाई

र गरिने छ बन्दोवस्त

बर्खि बार्ने ।

 

भो चाहिँदैन मृत्यु पछिको

सुख, सयल र स्वर्गीय आनन्द

बरु

अहिले नै गर किरीयाकर्म

र बार बर्खि

ताकि म मुक्त हुन सकुँ

यो नरकबाट ।

अपडेट : 2020-09-12 11:08:20




your-image

Leave a Comment