Logo
११ मंसिर २०७९, आईतवार
Logo

स्वर्गद्वारी विमानस्थल बनाउँछौ ः सूर्य थापा


प्यूठान, २६ कात्तिक ।

एमालेबाट प्यूठानका प्रतिनिधिसभा सदस्य उम्मेदवार सूर्य थापाले स्वर्गद्वारी विमास्थल आफ्नै नेतृत्वमा बन्ने दाबी गरेका छन् । स्वर्गद्वारी नगरपालिका–८ बर्जिवाङमा आयोजित चुनावी सभालाई सम्वोधन गर्दै थापाले प्यूठानीको जीवनस्तर उकास्न विमानस्थल कोशेढुंगा सावित हुनेगरी निर्माण गरिने घोषणा गरे ।

उनले प्यूठानको पवित्र धार्मिक एवं पर्यटकीय तीर्थस्थल स्वर्गद्वारी आश्रमलाई जोडेर निर्माण गर्ने विमानस्थलले जिल्लाको विकासमा महत्वपूर्ण भूमिका निर्वाह गर्ने समेत सुनाए । मत माग्न गाउँ पुगेका थापालाई स्थानीयले विमानस्थल निर्माण लगायतका दर्जनौ माग थमाएका छन् । स्थानीयले बुझाएको मागलाई सम्वोधन गर्न आफू जिम्मेवारपूर्ण तरिकाले लाग्ने समेत थापाले आश्वासन दिए ।

आफ्नो चुनावी प्रतिवद्धतामा समेत स्वर्गद्वारी विमानस्थल चाल्नेटारको जग्गा अधिग्रहणमा देखिएको समस्याका कारण अघि बढ्न नसकेको हुँदा आवश्यक वजेट व्यवस्था गरी निर्माण गरिने प्रतिवद्धता जनाइएको थापाले बताए । ‘यहाँ विमानस्थल नियमित संचालनमा पनि त्यति समस्या देखिदैन्’,थापाले स्थानीयबासीसँग भने, ‘चुनाव जिताएर पठाउनुस् विमानस्थल बनाउने प्रमुख एजेण्डा हामीले लिएका छौँ, हाम्रै नेतृत्वमा विमानस्थल बन्छ ।’ उनले प्यूठानका धार्मिक तीर्थस्थल स्वर्गद्वारीलाई जोडेर भारतका विभिन्न स्थान सहित काठमाडौँ, भैरहवा, पोखरा, नेपालगञ्ज, सुर्खेत, धनगढी, विराटनगर, विरगंज लगायत शहरबाट समेत आन्तरिक उडान हुनसक्ने सम्भावना औँल्याए ।

एमाले पार्टीको पर्यटन तथा नागरिक उड्डयन विभाग प्रमुख हुँदा पनि थापाले देशका विभिन्न क्षेत्रका आन्तरिक विमानस्थलहरुको अध्ययन, अवलोकन गरेको सुनाउँदै स्वर्गद्वारीकै कारण प्यूठानमा नियमित हवाई सेवाको समस्या नहुनेमा जोड दिए । ०७० सालको दोस्रो संविधानसभा निर्वाचनका बेला क्षेत्र नम्वर १ का तत्कालीन एमाले उम्मेदवार बामदेव गौतमले चाल्नेटार विमानस्थल निर्माण गर्ने लिखित प्रतिवद्धता जनाएका थिए । तर, चुनाव जितेर गइसकेपछि गौतमले चासो नदिँदा विमानस्थल निर्माणको प्रक्रिया अघि बढ्न सकेन । राष्ट्रिय राजनीतिमा पहुँच राख्ने नेता थापाको सक्रियताले चुनाव जितेर गइसकेपछि अब विमानस्थल बन्ने कुरामा जिल्लाबासीलाई आशा पलाएको देखिन्छ ।

 

 

यो खबर पढेर तपाईलाई कस्तो महसुस भयो ?