खोज

प्रदेश नं ५ का मुख्यमन्त्री शंकर पोखरेलले दाङ र बुटवलमा आउदो आर्थिक बर्षदेखि बिद्युतिय बस सञ्चालन गर्ने बताएका छन् । आईतबार तुलसीपुर उप महानगरपालिकाले आयोजना गरेको तुलसीपुर आर्थिक बिकास सम्मेलनलाई सम्बोधन गर्दै मुख्यमन्त्री पोख्रेलले स्थानीय रुटमा ३०÷४० वटा बिद्युतिय बस सञ्चालन गर्ने बताएका हुन् ।
प्रदेशका प्रमुख शहरहरुलाई वातावरणमैत्री बनाउन प्रदेश सरकारले स्थानीय तहहरुसंग सहकार्य गरेर बिद्युतिय बस सञ्चालन गर्ने तयारी भैरहेको उनले जानकारी दिए । प्रदेश भित्रका प्रमुख शहर भएका स्थानीय तहहरु पनि विद्युतिय बस सञ्चालन गर्न उत्सुक रहेको उनले बताए । ‘हामीले रुपन्देही, दाङ र बाँकेका स्थानीय तहहरुसंग सहकार्य गरेर बिद्युतिय बस सञ्चालन गर्दैछौ मुख्यमन्त्री पोख्रेलले भने । प्रदेश सरकारले बिद्युतिय बस सञ्चालन गरेमा प्रदुषण न्यूनीकरण हुने र मुलुक नयाँयुगमा प्रबेश गरेको नागरीकमा आभास पनि हुनेछ उनको विश्वास छ । साथै बिकास सम्मेलनलाई सम्बोधन गर्दै मुख्यमन्त्री पोखरेलले तुलसीपुरको विकासका लागि नयाँ ढंगबाट योजना बनाउनुपर्ने बताएका छन् । परम्परागत ढंगबाट अब तुलसीपुरलाई ‘स्मार्ट सिटी’ बनाउन नसकिने उनको भनाई छ । “तुलसीपुुरको विकासका लागि अब नयाँ योजना बनाउनुपर्छ, परम्पारगत ढंगका योजनाले तुलसीपुरलाई स्र्माट बनाउन सम्भव छैन” उनले भने ।
विकासका लागि स्थानीय नागरीकको रुची र सहभागिता हुनुपर्ने भएकोले उप महानगरपालीकावासीलाई बुझाउन समेत आग्रह गरे । अहिले दाङका उप महानगरपालीकाहरु भौगोलिक भन्दा पनि जनसंख्याका आधारमा निर्माण गरिएको भन्दै उनले अहिले उपमहानगरहरु विकासका दृष्टिले कमजोर भएको बताए । उप महानगरपालिकाको विकासका लागि स्थानीयतहहरुबीच सहकार्य हुन आवश्यक रहेको समेत उनको भनाई थियो । बजारको विकासका लागि गाउँको विकास अपरिहार्य रहेको भन्दै गाउँलाई बजारसंग जोड्ने गरि योजना बनाउनु पर्ने समेत उनको भनाई छ । अहिले दाङका कुनै पनि शहर व्यवस्थित नभएको भन्दै ति शहरहरुलाई ब्यबस्थित बनाउन निकै चुनौती सामना गर्नुपर्ने उनको भनाई छ ।
उप महानगरपालिकालाई ब्यबस्थित बनाउन बजार बाहिरको ब्यक्तिको जग्गालाई अधिग्रहण गर्ने र ति जग्गामा ब्यबस्थित बजार बनाएर आम्दानी भएको फाईदा जग्गा धनिलाई दिने गरीयो भने दोहोरो फाईदाहुने छ । त्यस्तै अर्को विकल्पका रुपमा ब्यक्तिको जग्गा अधिग्रहणगरि त्यसमा विकास गर्ने र मूल्यबृद्धि गरि ब्यक्तिलाई फिर्ता दिने तथा त्यसको केही हिस्सा उप महानगरपालिकाले लिने गरेमा ब्यबस्थित शहर निर्माण हुने मुख्यमन्त्री पोख्रेलको योजना छ । साथै शहरलाई ब्यबस्थित गर्न ब्यबस्थित सडक, घरहरुको डिजाईन, बिजुलीको प्रयोग, ढल निकास, नदि किनारको बारेमा योजना, खोलाको किनारको बस्ति ब्यवस्थित लगायतका कुरामा ध्यानदिनुपर्ने बताए । त्यस्तै शहरका नागरिकलाई ग्रामिण क्षेत्रमा बसोबास गर्ने वातावरण तयार पार्नुपर्ने, बजारका उत्तरतिरका पहाडलाई हिल स्टेशनका रुपमा विकास गर्नुपर्ने तथा दक्षिणतिरका फाँटमा रात्रीकालीन बिकासका रुपमा ध्यानदिनुपर्ने उनले बताए ।
त्यसैगरी तुलसीपुरको ‘क’ लाईनलाई ब्यबसायीक केन्द्रका रुपमा संरचनाहरु तयार पार्नुपर्ने, राम्रो होटेल व्यबसायको विकासमा ध्यान दिनुपर्ने उनको भनाई छ । दाङमा उत्पादन भएको मन्सुली चामलले काठमाडौंमै राम्रो बजार पाएकाले मन्सुली चामलको उत्पादन बढाई ब्रान्डका रुपमा विकास गर्नुपर्ने, कृषिको विकासमा ध्यान दिनुपर्ने, दाङलाई कर्णालीकै ट्रान्जिट प्वाईन्टका रुपमा विकास गर्न सकिने उनको भनाई छ । त्यस्तै शिक्षा, स्वास्थ्य, उद्योग, सूचना, प्रबिधिको विकास लगायतमा समेत ध्यान दिनुपर्ने मुख्यमन्त्री पोख्रेलले बताए ।
कार्यक्रममा आर्थिक विकासमा लगानी ब्यबस्थापन र सम्भावना बारे बिष्णु पुरी, तुलसीपुर उप महानगरपालिकामा आर्थिक बिकासका सम्भावना, नीति तथा कार्यक्रमका बारेमा बाबुराम राणाभाट, प्रदेश सरकारको स्थानीय आर्थिक विकास सम्बन्धि रणनीति र सोँच बारेमा पाँच नम्बर प्रदेश योजना आयोगका उपाध्यक्ष डाक्टर प्रकाश श्रेष्ठ, स्थानीय आर्थिक विकासको अवधारणाबारे तुलसीपुर उप महानगरपालिकाका प्रमुख प्रशासकीय अधिकृत आनन्द शारुले प्रस्तुती राखेका थिए ।
कार्यक्रममा सहभागिहरुलाई स्वागत गर्दै तुलसीपुर उप महानगरपालिकाका प्रमुख घनश्याम पाण्डेले तुलसीपुर आर्थिक विकास सम्मेलनबाट तुलसीपुरको आर्थिक विकासका लागि आएका सुझाबहरुलाई आउँदो बर्षको बजेट, नीति तथा कार्यक्रममा समावेश गर्ने प्रतिबद्धता समेत जनाएका छन् ।