खोज

बुटवल,२३ चैत । संविधान बन्नु अघि संविधान सभा चुनावमा माओवादी पार्टी र त्यसका अध्यक्ष प्रचण्ड (हालका प्रधानमन्त्री) ले पहिचानका आधारमा प्रदेश नामाकरणको वकालत गर्दै आए । पहिचान सहितको संघीयताका पक्षमा आन्दोलित समेत भए । सोही अनुसार प्रदेशका नाम पनि प्रस्ताव गरे । संविधान बनेपछि पनि माओवादी र प्रचण्डले पहिचानका कुरा गर्दै आएका थिए । तर लुम्बिनी,गण्डकी,बागमती,सुदूरपश्चिम र कर्णाली प्रदेश हुंदै कोशी प्रदेशससम्म आइपुग्दा माओवादी र प्रचण्डले पहिचानको मुद्दा छाडिसकेका थिए । तर जब प्रदेश १ को नामाकरण कोशी पारित भएको केही दिनपछि आन्दोलन शुरु भयो, माओवादी पार्टी र त्यसका अध्यक्ष एवं प्रधानमन्त्री प्रचण्डले आफ्नो द्वैध चरित्र नांगोरुपमा प्रदर्शन गरे ।
कोशो नामाकरण प्रदेश सभाबाट पारित गर्दा पक्षमा उभिएको पार्टी र त्यसका अध्यक्ष एवं प्रधानमन्त्री आन्दोलनरत पक्षलाई खुशी पार्न पुनः पहिचानको पक्षमा उभिन थालेका छन् । सोही अनुसार प्रधानमन्त्री प्रचण्डले कोशी प्रदेशको नाम सच्याउन पहल गर्ने बताएका छन् ।

तत्कालीन एक नम्बर प्रदेशको नाम कोशी प्रदेश राख्नुपर्ने पक्षमा प्रदेश सभामा मतदान गरेको माओवादी केन्द्र त्यसको एक महिनापछि नामांकन सच्याउने पक्षमा उभिनु द्वैध चरित्र भएको राजनीतिक विश्लेषक ऋषि आजाद बताउंछन् ।
गत फागुन १७ गते प्रदेशसभाबाट नाम पारित हुँदा माओवादी केन्द्रले भूगोलको आधारमा कोशी प्रदेशको पक्षमा मतदान गरेको थियो ।

माओवादी केन्द्रका नेता सुरेश आलेमगरसहित कोशी प्रदेशका माओवादी केन्द्रका केन्द्रीय सदस्यहरु र मोर्चाका नेताहरुको टोलीले आज बिहान प्रधानमन्त्री प्रचण्डलाई भेटेर ज्ञापन पत्र बुझाएपछि प्रचण्डले कोशी प्रदेशको पक्षमा प्रदेश सभामा मतदान गर्ने नीति पार्टी केन्द्रको नभएको बताए ।

पहिचान पक्षधरले कोशी प्रदेशको नाम खारेज गरेर नयाँ नाम राख्नुपर्ने मागसहित आन्दोलन गर्दै आएका छन् । आन्दोलनको क्रममा यही चैत ५ गते विराटनगरमा प्रहरीको लाठी प्रहारबाट घाइते भएका ४२ वर्षीय पदमबहादुर लिम्बु लाजेहाङ्गको उपचारको क्रममा चैत १० गते मृत्यु भएको थियो ।