खोज

बुटवल, २२ माघ

प्रेस चौतारी नेपालको २५ औ स्थापना दिवसको अवसरमा रुपन्देही शाखाले रक्तदान कार्यक्रम गरी मनाईएको छ । कार्यक्रमको चौतारीका केन्द्रीय सचिव प्रदिप आचार्यले रक्तदातालाई ब्लड ब्याग हस्तान्तरण गरी कार्यक्रमको उदघाटन गर्दै पत्रकारहरु आफ्नो पेशासंगै सामाजिक कार्यमा समेत सधै क्रियाशिल रहेको दाबी गरे । दिवसको अवसरमा प्रदेशका १२ जिल्लामा विविध कार्यक्रम गरी भातृत्व र रचनात्मक कार्यहरु गरी मनाईएको उनले बताए । विभिन्न जिल्लामा चौतारी मिलन, फुटसल, मदरसामा स्टेशनरी वितरण लगायतका रचनात्मक कार्यक्रम गरि मनाईएको उनले बताए । प्रेस चौतारी रक्तदान अभियानमा धेरै पहिले देखि जोडिएको भन्दै आगामी दिनहरुमा समेत निरन्तरता दिने प्रतिवद्घता जनाए ।

कार्यक्रममा नेपाल स्वयंसेवी रक्तदाता समाज, रुपन्देही शाखाका अध्यक्ष कृष्ण चौहान क्षेत्रीले रुपन्देही रक्तदाताको हब बन्न सफल भएको बताए । रुपन्देही जिल्लाको मागलाई पूरा गर्दै चितवन, पाल्पा, दाङ जस्ता छिमेकी जिल्लासहित देशभरका अधिकांश स्थानमा रगतको मागलाई यहाँबाट पुरा गर्दै आएको उनले बताए ।

रगतको माग धेरै हुने रुपन्देहीमा रक्तदाताको संख्या अभिवृद्धिका लागि अभियानहरु समेत चलाउँदा सफलता मिलेको उनले बताए । कार्यक्रममा सहभागी भएका पुर्व क्रिकेट खेलाडी शक्ति गौचनले खेलाडीहरु खेलसंगै सामाजिक उत्तरदायित्वमा पनि लाग्नुपर्ने बताए ।

कार्यक्रममा केन्द्रीय सदस्य मिलन गाहा, सल्लाहकार दिनेश पाण्डे, ब्लड बैकका निरञ्जन राजभण्डारी, प्रेस चौतारी नेपाल रुपन्देहीका अध्यक्ष लक्ष्मण पौडेलले रगत दान पवित्र कार्य भएको भन्दै सबैमा चेतना जगाउने गरी निरन्तर कार्यक्रम गर्नुपर्ने बताए । प्रेस चौतारी नेपाल, रुपन्देही शाखाको आयोजना तथा नेपाल रेडक्रम सोसाइटी रक्तसंचार केन्द्र बुटवलको प्राविधिक सहयोगमा भएको कार्यक्रममा २५ युनिट रगत संकलन भएको संयोजक स्वस्तिक श्रेष्ठले बताए ।