खोज

भैरहवा, १ माघ । रोहिणी गाउँपालिका, रुपन्देहीको १२ औं गाउँसभा शनिबार सम्पन्न भएको छ । गाउँसभाको उद्घाटन गर्दै प्रतिनिधिसभा सदस्य तथा पूर्वमन्त्री छविलाल विश्वकर्माले तीनै तहका सरकारबीच समन्वय हुनुपर्ने बताए । उनले जनसरोकारका विषयमा मिलेर काम गर्नुपर्ने अवस्था रहेको बताए ।
नेकपा एमालेका केन्द्रीय सचिव समेत रहेका नेता विश्वकर्माले धरासायी बनेको मुलुकको अर्थतन्त्र सुधार गरेर अघि बढ्नुपर्ने बताए । नयाँ सरकार गठन भएपछि उद्योगी–व्यवसायी आशावादी हुने परिस्थिति बनेको उनको भनाइ थियो । रोहिणी गाउँपालिकामा क्याम्पस बनाउनुपर्ने तथा रोहिणी नदीको संरक्षण, विकास र प्रवद्र्धन आवश्यक रहेको बताए ।
त्यस्तै लुम्बिनी प्रदेश सभा सदस्य तथा पूर्व राज्यमन्त्री अब्दुल रज्जाकले स्थानीय सरकारले प्राविधिक शिक्षामा जोड दिनुपर्ने बताए । उनले सिंहदरबारको अधिकार गाउँगाउँमा भनिएता पनि स्थानीय सरकारले पूर्ण रुपमा अधिकार पाइसकेको अवस्था नरहेकाले संविधान कार्यान्वयनलाई प्राथमिकता दिनुपर्ने बताए । लुम्बिनी प्रदेशसभा सदस्य आशिषकुमार चौधरीले यस क्षेत्रको विकासका लागि एकजुट भएर अघि बढ्नुपर्नेमा जोड दिए । जिल्ला समन्वय समिति रुपन्देहीका प्रमुख उमाकान्त चापागाईले गाउँपालिका भवन निर्माणमा रोहिणीलाई प्राथमिकताका साथ अघि बढाउनुपर्नेमा जोड दिए । जिल्ला समन्वय समिति रुपन्देहीका पूर्व प्रमुख एकराज विश्वकर्माले गाउँपालिकाको भवनका लागि जिल्ला समन्वय समितिको नाममा रहेको जग्गा हस्तान्तरण गरिएको बताए ।

रोहिणी गाउँपालिकाका अध्यक्षविद्या प्रसाद यादवले गाउँपालिकाको प्रशासनिक भवन, १५ शैयाको अस्पताल, क्याम्पस सञ्चालनलाई जोड दिएको बताए । रोहिणी गाउँपालिकाकापूर्व अध्यक्ष सनोज कुमार यादवले गाउँपालिका भवनलाई पूर्णता दिन आग्रह गरे । राप्रपाका केन्द्रीय सहायक महामन्त्री ताहिर अलीले जनताको प्रतिनिधि भइसकेपछि एउटा पार्टी मात्र नभइ सबैको हुनुपर्ने बताए । नेपाली कांग्रेस रुपन्देही क्षेत्र नम्बर १ का सचिव बैजनाथ सहानीले कृषिमा उपलब्धी देखिने खालको नीति बनाउनुपर्ने बताए । कार्यक्रममा रोहिणी गाउँपालिका वडा नम्बर ६ का वडाअध्यक्ष इन्द्रमान चौधरी,
योजना शाखा प्रमुख राजकुमार मिश्रा लगायतले आफ्ना भनाई राखेका थिए ।
यसैबीच रोहिणी गाउँपालिकाले १२ औं गाउँसभामा गाउँपालिकाका पूर्व अध्यक्ष सनोज कुमार यादवलाई सम्मान गरेको छ । गाउँपालिका भवन निर्माणका लागि जग्गा प्राप्तीमा सहयोग गरेको भन्दै यादवलाई सम्मान गरिएको हो ।
त्यस्तै गाउँपालिका भवन जाने सडकका लागि निःशुल्क जग्गा प्रदान गरी सहयोग गर्ने विष्णु प्रसाद चौधरी, इसरावती भुज, रामवृक्ष कोहार, रोहितचौधरी र प्रहलादे कोहारलाई सम्मानगरिएको थियो ।
त्यसै गरी प्रतिनिधिसभा सदस्यमा रुपन्देही क्षेत्र नम्बर १ बाट निर्वाचित छविलाल विश्वकर्मा, प्रदेश सभा सदस्यमा क्षेत्र नम्बर १ (१) बाट निर्वाचित आशिषकुमार चौधरी, क्षेत्र नम्बर १ (२)बाट निर्वाचित अब्दुल रज्जाक, जिल्ला समन्वय समिति रुपन्देहीका प्रमुख उमाकान्त चापागाई, पूर्व प्रमुख एकराज विश्वकर्मा र पूर्व उपप्रमुख पशुपतिनाथ यादवलाई सम्मान गरिएको थियो ।